قاراعاندى وبلىسىنىڭ قارقارالى اۋدانىنداعى قۇيرىقتىكول ۋچاسكەسىندە سيرەك جەر مەتالدارىنىڭ مول قورى بار پەرسپەكتيۆالى ايماقتار انىقتالدى، دەپ حابارلايدى "ادىرنا" ۇلتتىق پورتالى "تسەنترگەولسەمكا" جشس-نە سىلتەپ.
2022-2024 جىلدارعا ارنالعان مەملەكەتتىك باعدارلاما اياسىندا جۇرگىزىلگەن گەولوگيالىق بارلاۋ جۇمىستارى ناتيجەسىندە شامامەن ميلليون تونناعا جۋىق سيرەك جەر ەلەمەنتتەرى بار بىرنەشە ايماق تابىلدى. ونىڭ ىشىندە ەڭ پەرسپەكتيۆالىسى رەتىندە ىرعىز جانە دوس 2 اۋداندارى اتالدى. مۇندا سيرەك جەر ەلەمەنتتەرىنىڭ جالپى مولشەرى 0,1%-دان جوعارى، ال كەيبىر ۇلگىلەردە 0,25%-دان اسىپ وتىر.
گەولوگيالىق زەرتتەۋلەر بارىسىندا ىرعىز اۋدانىنداعى الدىن الا ەسەپتەلگەن قور شامامەن 800 مىڭ توننا سيرەك مەتالداردى قۇرايتىنى انىقتالدى. سونىمەن قاتار، بۇرعىلاۋ ۇڭعىمالارى كەن شوعىرلارىنىڭ تۇبىنە جەتپەگەندىكتەن، ناقتى قور ودان دا كوپ بولۋى مۇمكىن دەگەن بولجام جاسالىپ وتىر.
زەرتتەۋلەردىڭ شەكتەۋلى كولەمىنە بايلانىستى "تسەنترگەولسەمكا" جشس ءوز قاراجاتى ەسەبىنەن قوسىمشا ساراپتامالار جۇرگىزىپ، سيرەك جەر ەلەمەنتتەرىنىڭ قورىن الدىن الا باعالاۋعا مۇمكىندىك الدى. ناتيجەسىندە قۇيرىقتىكول ۋچاسكەسىنىڭ بارلىق دەرلىك اۋماعىن قامتيتىن جاڭا پەرسپەكتيۆالى ايماق – جاڭا قازاقستان انىقتالدى. بۇل ايماقتىڭ بولجامدى قورى 20 ميلليون توننادان اسۋى مۇمكىن، ال سيرەك جەر ەلەمەنتتەرىنىڭ ورتاشا مولشەرى شامامەن 700 گ/ت دەپ باعالانىپ وتىر.
قازاقستاندا سيرەك جەر ەلەمەنتتەرىنىڭ مۇنداي شوعىرلانعان كەن ورىندارى بۇرىن-سوڭدى تىركەلمەگەن. بۇل جاڭا ونەركاسىپتىك تيپ رەتىندە قاراستىرىلىپ، ەلىمىزدى سيرەك مەتالداردىڭ الەمدىك قورى بويىنشا جەتەكشى ورىنعا شىعارۋ مۇمكىندىگىنە جول اشادى.
سيرەك جەر مەتالدارىنىڭ ءوندىرىسى جوعارى تەحنولوگيالىق سالالاردى دامىتۋعا ىقپال ەتىپ، ءوڭىردىڭ ەكونوميكالىق ءوسىمى مەن ينۆەستيتسيالىق تارتىمدىلىعىن ارتتىرۋعا سەپتىگىن تيگىزەدى. قازىرگى تاڭدا كەندى بايىتۋ تەحنولوگياسىن جەتىلدىرۋ جانە باعالى كومپونەنتتەردى ءوندىرۋ بويىنشا قوسىمشا زەرتتەۋلەر جۇرگىزىلۋدە.
