قاراعاندىلىق سەگىز جاسار وقۋشى لاپىلداعان ورتتەن قارىنداسىن قالاي قۇتقارىپ قالعانىن ايتتى. پالەكەت كەسىرىنەن ءجۇزى مەن قولىن كۇيىك شالعان باتىر بالا ءبىر جىلدان كەيىن عانا تىلگە كەلىپ، ءورت جايلى ايتا الدى. جاس باتىردىڭ اتاسى مەن اجەسى ورتكە ورانىپ، بالانىڭ جانىندا سىز قالدى، دەپ حابارلايدى "ادىرنا" ۇلتتىق پورتالى.
قاراعاندىدا سەگىز جاسار وقۋشى نۇريدەن امانتاي جانىپ جاتقان ۇيدەن ەكى جاسار قارىنداسىن قۇتقارىپ قالدى. ولاردىڭ ءۇيى تولىعىمەن وتقا ورانىپ، بالالاردىڭ اتاسى مەن اجەسى كۇيىكتەن قايتىس بولعان. نۇريدەن ءورت اۋزىنان قارىنداسىن اراشالاپ قالعان. قازىر ءۇءيى وتقا ورانعان نۇريدەننىڭ وتباسى باسپاناعا مۇقتاج.
بۇل تۋرالى قاراعاندى وبلىسى اكىمدىگىنىڭ ءباسپاسوز قىزمەتى حابارلادى.
ءورت 2022 جىلعى جەلتوقسان ايىندا بولعان. بالانىڭ قولى مەن بەتىنەن كۇيگەن. نۇريدەن ءورت جايلى ەندى عانا ايتا الادى.
ء"ورت ۇيدە مەن قارىنداسىم، اتام جانە اجەم بولعان كەزدە باستالدى. پەش تۇرعان كىرەبەرىستە بىردەڭە جارىلىپ كەتتى. ءبىز ول ۋاقىتتا اس ۇيدە تاماقتانىپ وتىرعان ەدىك. اتام مەن اجەم دالىزگە نە بولعانىن كورۋ ءۇشىن شىعىپ كەتىپ، ۇزاق ۋاقىت ورالمادى. سودان كەيىن ولاردىڭ ارتىنان بارىپ، پەشتىڭ جانىندا ءبارى جانىپ تۇرعانىن كوردىم. دالىزدەن شىعا المايتىنىمدى ءتۇسىندىم. اس ۇيگە جۇگىرىپ بارىپ، اناما قوڭىراۋ شالىپ، قارىنداسىمدى الىپ، ونى تەرەزەنىڭ الدىنا كوتەردىم. سودان كەيىن وعان ءوزىم كوتەرىلىپ، رابيامەن بىرگە سەكىرگۋگە دايىندالدىم. وسى كەزدە كورشىلەر تەرەزەگە قاراي جۇگىرىپ كەلدى. ولارعا قارىنداسىمدى بەردىم دە، ءوزىم شىقتىم", – دەدى نۇريدەن.
بالالاردىڭ اتا-اجەسى سىرتقا شىعا العانىمەن، دەنەلەرىنىڭ 40-60 پايىزىن كۇيىك شالعان. ولار نۇريدەنمەن بىرگە اۋرۋحاناعا جاتقىزىلدى.
"مەن كەلگەندە ءۇي لاپىلداپ جانىپ جاتتى. كۇيەۋىمنىڭ اتا-اناسىن جان ساقتاۋ بولىمىنە، نۇريدەندى قاراپايىم پالاتاعا جاتقىزدى. وكىنىشكە قاراي، ەكى كۇننەن كەيىن قايىن اتام قايتىس بولدى. تاعى ەكى اپتادان كەيىن قايىن ەنەم قايتىس بولدى. قازىر ءبىز كۇيەۋىمىزدىڭ تۋىستارىندا ەكى بولمەلى پاتەردە تۇرامىز. ولاردىڭ بەس بالاسى بار", – دەيدى نۇريدەننىڭ اناسى ناديرا اقىشوۆا.
ناديرانىڭ جۇبايىمەن بىرگە ءتورت بالاسى بار. ءورت كەزىندە 10 جاسار ۇلى مەن 13 جاسار قىزى ولار مەكتەپتە بولعان. قازىر وتباسى باسپاناعا مۇقتاج.
جۋىردا № 36 جالپى ءبىلىم بەرەتىن مەكتەپتىڭ 3-سىنىبىندا وقيتىن نۇريدەنگە قالالىق ءبىلىم ءبولىمىنىڭ باسشىسى ەسەنتاي ءاشىم قوناققا كەلدى. ول وقۋشىعا توتەنشە جاعدايدا كورسەتكەن باتىلدىعى مەن تاباندىلىعى ءۇشىن العىسىن ءبىلدىرىپ، ءبىلىم ءبولىمىنىڭ قىزمەتكەرلەرى اتىنان ۆەلوسيپەد سىيلادى.
"ادىرنا" ۇلتتىق پورتالى
