Qaraǧandy oblysynyŋ Qarqaraly audanyndaǧy Qūiryqtyköl uchaskesınde sirek jer metaldarynyŋ mol qory bar perspektivaly aimaqtar anyqtaldy, dep habarlaidy "Adyrna" ūlttyq portaly "Sentrgeolsemka" JŞS-ne sıltep.
2022-2024 jyldarǧa arnalǧan memlekettık baǧdarlama aiasynda jürgızılgen geologiialyq barlau jūmystary nätijesınde şamamen million tonnaǧa juyq sirek jer elementterı bar bırneşe aimaq tabyldy. Onyŋ ışınde eŋ perspektivalysy retınde Yrǧyz jäne Dos 2 audandary ataldy. Mūnda sirek jer elementterınıŋ jalpy mölşerı 0,1%-dan joǧary, al keibır ülgılerde 0,25%-dan asyp otyr.
Geologiialyq zertteuler barysynda Yrǧyz audanyndaǧy aldyn ala eseptelgen qor şamamen 800 myŋ tonna sirek metaldardy qūraityny anyqtaldy. Sonymen qatar, būrǧylau ūŋǧymalary ken şoǧyrlarynyŋ tübıne jetpegendıkten, naqty qor odan da köp boluy mümkın degen boljam jasalyp otyr.
Zertteulerdıŋ şekteulı kölemıne bailanysty "Sentrgeolsemka" JŞS öz qarajaty esebınen qosymşa saraptamalar jürgızıp, sirek jer elementterınıŋ qoryn aldyn ala baǧalauǧa mümkındık aldy. Nätijesınde Qūiryqtyköl uchaskesınıŋ barlyq derlık aumaǧyn qamtityn jaŋa perspektivaly aimaq – Jaŋa Qazaqstan anyqtaldy. Būl aimaqtyŋ boljamdy qory 20 million tonnadan asuy mümkın, al sirek jer elementterınıŋ ortaşa mölşerı şamamen 700 g/t dep baǧalanyp otyr.
Qazaqstanda sirek jer elementterınıŋ mūndai şoǧyrlanǧan ken oryndary būryn-soŋdy tırkelmegen. Būl jaŋa önerkäsıptık tip retınde qarastyrylyp, elımızdı sirek metaldardyŋ älemdık qory boiynşa jetekşı orynǧa şyǧaru mümkındıgıne jol aşady.
Sirek jer metaldarynyŋ öndırısı joǧary tehnologiialyq salalardy damytuǧa yqpal etıp, öŋırdıŋ ekonomikalyq ösımı men investisiialyq tartymdylyǧyn arttyruǧa septıgın tigızedı. Qazırgı taŋda kendı baiytu tehnologiiasyn jetıldıru jäne baǧaly komponentterdı öndıru boiynşa qosymşa zertteuler jürgızılude.
Ūqsas jaŋalyqtar
