قازاقستاننىڭ ءۇش ءىرى قالاسى – استانا، الماتى جانە شىمكەنت اكىمدىكتەرى ناۋرىز مەرەكەسىن اتاپ وتۋگە قوماقتى قاراجات جۇمسادى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
استانادا مەرەكەلىك ءىس-شارالاردى قارجىلاندىرۋ اۋدان اكىمدىكتەرى ارقىلى جۇزەگە اسىرىلدى. جالپى، قالا بويىنشا ناۋرىزدى تويلاۋعا 366,4 ميلليون تەڭگە بولىنگەن. الايدا مەملەكەتتىك ساتىپ الۋ پورتالىنداعى كەيبىر تەندەرلەر شىعىنداردىڭ بۇدان دا جوعارى بولۋى مۇمكىن ەكەنىن كورسەتەدى. مىسالى، سارايشىق اۋدانى كوشەلەر مەن الاڭداردى بەزەندىرۋگە 827 ميلليون تەڭگە، ال سارىارقا اۋدانى مەرەكەلىك بەزەندىرۋ جانە شاعىن ساۋلەتتىك نىساندار ورناتۋعا 405,8 ميلليون تەڭگە بولگەن.
الماتىدا ناۋرىز مەرەكەسىن ۇيىمداستىرۋعا مادەنيەت باسقارماسى جاۋاپتى بولدى. مەملەكەتتىك ساتىپ الۋ پورتالىنىڭ مالىمەتتەرى بويىنشا، ناۋرىز قارساڭىندا 555,8 ميلليون تەڭگەگە 8 تەندەر وتكىزىلگەن. بۇل قارجى كونتسەرتتەر مەن جارمەڭكەلەردى ۇيىمداستىرۋعا، ساحنا قۇرىلىسىنا، ساۋلەتتىك نىساندار مەن تۋلار ورناتۋعا، دىبىستىق جانە جارىقتاندىرۋ جابدىقتارىنا جۇمسالعان. الايدا قالا اكىمدىگى بۇل شىعىنداردى رەسمي تۇردە راستاعان جوق جانە اقپاراتتىڭ ناقتىلانۋىنا ەكى اي ۋاقىت قاجەت ەكەنىن حابارلادى.
شىمكەنتتە مەرەكەنى ۇيىمداستىرۋعا مادەني-كوپشىلىك ءىس-شارالاردى ۇيىمداستىرۋ ديرەكتسياسى مەن اۋداندىق اكىمدىكتەر جاۋاپتى بولدى. نەگىزگى شىعىندار گالا-كونتسەرتكە، وتشاشۋعا، اۋە شارلارى مەن كيىز ۇيلەر ورناتۋعا باعىتتالدى. باستاپقىدا اكىمدىك ناۋرىزعا 132,6 ميلليون تەڭگە بولىنگەنىن حابارلادى، بىراق كەيىن قوسىمشا بەزەندىرۋ جۇمىستارىنا تاعى 12,8 ميلليون تەڭگە جۇمسالعانى انىقتالدى. وسىلايشا، شىمكەنت بويىنشا جالپى شىعىن 156,5 ميلليون تەڭگەنى قۇرادى.
