قازاقستان حالقى اسسامبلەياسى (قحا) 23-24 ساۋىردە رەفەرەندۋم وتكىزۋ تۋرالى تاراعان حابارلامالارعا قاتىستى رەسمي مالىمدەمە جاسادى، دەپ حابارلايدى "ادىرنا" ۇلتتىق پورتالى.
WhatsApp جەلىسىندە قازاقستان حالقى اسسامبلەياسىنىڭ الداعى سەسسياسىندا رەفەرەندۋم وتكىزۋ تۋرالى ماسەلە قارالاتىنى جايلى حابارلاما تاراعان. الايدا بۇل اقپاراتتى قاراعاندى وبلىسىنىڭ پوليتسياسى جوققا شىعاردى.
"الەۋمەتتىك جەلىلەردە قازاقستان حالقى اسسامبلەياسىنىڭ سەسسياسىندا رەفەرەندۋم وتكىزۋ ماسەلەسى تالقىلاناتىنى تۋرالى جالعان اقپارات تارادى. وسى فەيكتى تاراتقان قاراعاندى وبلىسىنىڭ ەكى تۇرعىنى انىقتالىپ، ۇستالدى. ولار اكىمشىلىك جاۋاپكەرشىلىككە تارتىلدى. قازىرگى ۋاقىتتا تەكسەرۋ جالعاسۋدا، جالعان اقپارات تاراتقان باسقا ادامدار دا جاۋاپقا تارتىلادى", - دەپ حابارلادى پوليتسيا دەپارتامەنتى.
ۆەدومستۆو ازاماتتاردى تەك رەسمي اقپارات كوزدەرىنە سەنۋگە شاقىرىپ، جالعان مالىمەت تاراتۋ قىلمىستىق جاۋاپكەرشىلىككە اكەلۋى مۇمكىن ەكەنىن ەسكەرتتى.
قازاقستان حالقى اسسامبلەياسى توراعاسىنىڭ ورىنباسارى لۋگمار بۋلاروۆ بۇل اقپاراتتىڭ شىندىققا جاناسپايتىنىن ايتىپ، جالعان حابار تاراتقانداردى ارانداتۋشىلار دەپ اتادى.
"قازاقستان حالقى اسسامبلەياسىنىڭ توراعا ورىنباسارى رەتىندە رەسمي تۇردە مالىمدەيمىن: بۇل – جالعان اقپارات جانە ارانداتۋشىلىق. مەن الداعى سەسسيانى دايىنداۋ جۇمىستارىنا تىكەلەي قاتىسىپ وتىرمىن. مۇنداي ماسەلە كۇن تارتىبىندە مۇلدە جوق. اسسامبلەيانىڭ ەشقاشان جانە قازىر دە مۇنداي وكىلەتتىگى بولعان ەمەس. سوندىقتان ازاماتتاردان جالعان اقپاراتقا سەنبەۋدى سۇرايمىن", - دەدى بۋلاروۆ.
قازاقستان حالقى اسسامبلەياسى – ەلدەگى بارلىق ەتنوس وكىلدەرىن بىرىكتىرەتىن كەڭەسشى-كەڭەستىك ورگان. ونىڭ باستى مىندەتى – قوعامدىق كەلىسىمدى نىعايتۋ جانە ەتنوسارالىق تاتۋلىقتى ساقتاۋ. 2024 جىلعى 24-25 ساۋىردە استانادا وتكەن قحا سەسسياسىنىڭ تاقىرىبى "بىرلىك. جاسامپازدىق. ورلەۋ" بولدى.
قۇزىرلى ورگاندار جالعان اقپارات تاراتقان ازاماتتاردى انىقتاۋ جۇمىستارىن جالعاستىرىپ جاتىر.
