بيزنەس سەرىكتەسى ولتىرگەن بولۋى مۇمكىن. الماتىدان كۇيگەن ادامنىڭ دەنەسى تابىلدى

الماتىدا قاراساي اۋدانىنان كۇيگەن ادامنىڭ دەنەسى بار ورتەنگەن اۆتوكولىك تابىلدى، دەپ حابارلايدى “ادىرنا” ۇلتتىق پورتالى. وقيعا ورنىنان تۇسىرىلگەن ۆيدەو «پيسما پرەزيدەنتۋ» Telegram-ارناسىندا جاريالانعان. اقپاراتقا سايكەس، كولىك 31 ناۋرىزدا دەمالىس ايماعىنىڭ ماڭىنان تابىلعان. الماتى وبلىستىق پوليتسيا دەپارتامەنتىنىڭ مالىمەتىنشە، كىسى ءولتىرۋ فاكتىسى بويىنشا الدىن الا تەرگەۋ باستالعان. «جەدەل-ىزدەستىرۋ شارالارى بارىسىندا 43 جاستاعى كۇدىكتى ءىزىن سۋىتپاي انىقتالىپ، ۇستالىپ، ۋاقىتشا ۇستاۋ يزولياتورىنا قامالدى. قىلمىستىڭ بارلىق ءمان-جايىن وبەكتيۆتى زەرتتەۋ ءۇشىن قاجەتتى تەرگەۋ امالدارى جۇرگىزىلۋدە»، – دەلىنگەن حابارلامادا. پوليتسيا قىلمىستىڭ ەگجەي-تەگجەيىن اشىپ ايتپادى، بىراق الەۋمەتتىك جەلىلەردە كۇدىكتى ءوز بيزنەس-سەرىكتەسىن بالعامەن باسىنان ۇرىپ ءولتىرىپ، كەيىن ءىزىن جاسىرۋ ءۇشىن ءمايىتتى كولىكپەن بىرگە ورتەپ، قاشىپ كەتكەنى ايتىلۋدا.