بۇگىن - كومپوزيتور، ديريجەر، قازاقستاننىڭ ەڭبەك سىڭىرگەن ونەر قايراتكەرى، حالىق قاھارمانى نۇرعيسا تىلەنديەۆتىڭ تۋعانىنا 100 جىل تولدى، دەپ حابارلايدى “ادىرنا” ۇلتتىق پورتالى.
قازاقتىڭ ءبىرتۋار پەرزەنتى - 1925 جىلى 1 ءساۋىر كۇنى الماتى وبلىسى ىلە اۋدانىندا دۇنيەگە كەلگەن. نۇرعيسا تىلەنديەۆ قازاقتىڭ ۇلتتىق ونەرى مەن مادەنيەتىندە وشپەس ءىز قالدىردى. كوزى تىرىسىندە حالىق اندەرى مەن كۇيلەرىن وركەسترمەن ورىنداۋدىڭ ۇلگىسىن جاساعان.
ءارتۇرلى جىلدارى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديريجەرى، قازاقتىڭ حالىق اسپاپتار وركەسترىنىڭ باس ديريجەرى، قازاقفيلم كينوستۋدياسى مۋزىكا رەداكتسياسىنىڭ باس رەداكتورى، 1981 جىلدان وتىرار سازى فولكلورلىق-ەتنوگرافيالىق ءانسامبلىنىڭ ۇيىمداستىرۋشىسى ءارى كوركەمدىك جەتەكشىسى قىزمەتتەرىن اتقاردى.
التىن تاۋلار وپەراسىنىڭ (ق.قوجامياروۆپەن بىرگە), دوستىق جولىمەن بالەتىنىڭ (ل.ستەپانوۆپەن بىرگە), ورتەكە بالەت-پوەماسىنىڭ، مەنىڭ قازاقستانىم كانتاتاسىنىڭ، وركەسترگە ارنالعان پوەما، اتا تولعاۋى، اقساق قۇلان، اققۋ، ارمان، ماحامبەت، كوش كەرۋەن پوەمالارى مەن حالىق قۋانىشى، قايرات، جەڭىس سالتاناتى اتتى كىرىسپەلەردىڭ، 400-گە تارتا ءان مەن رومانستىڭ اۆتورى.
50-دەن استام درامالىق قويىلىمعا، 19 كوركەم فيلمگە، 17 مۋلتيپليكاتسيالىق فيلمگە، 14 دەرەكتى-حرونيكالىق فيلمگە مۋزىكا جازدى.
بىرەگەي تۇلعا ەكى رەت ەڭبەك قىزىل تۋ وردەنىمەن ماراپاتتالعان.
