بۇگىن — كومپوزيتور، ديريجەر، كسرو حالىق ءارتىسى، قازاقستاننىڭ ەڭبەك سىڭىرگەن ونەر قايراتكەرى، قازاقستان مەملەكەتتىك سىيلىعىنىڭ لاۋرەاتى، حالىق قاھارمانى تىلەنديەۆ نۇرعيسا اتابايۇلىنىڭ تۋعان كۇنى.
داۋلەسكەر دومبىراشى 1925 جىلى 1 ءساۋىر كۇنى الماتى وبلىسى، ىلە اۋدانى، شيلىكەمەر اۋىلىندا دۇنيەگە كەلگەن. ن.تىلەنديەۆ قازاق اكادەميالىق فولكلورلىق-ەتنوگرافيالىق حالىق مۋزىكالىق اسپاپتارى «وتىرار سازى» وركەسترىن قازاق فيلارمونياسى جانىنان 1980 جىلى ۇيىمداستىردى. العاش شاعىن انسامبل رەتىندە جۇمىس ىستەدى، ال 1982 جىلدان وركەستر بولىپ قۇرىلدى.
مۇنداعى قوس ىشەكتى، ءۇش ىشەكتى دومبىرالار، قوبىز، سىبىزعى، ساز سىرناي، جەتىگەن، شاڭ قوبىز، اساتاياق سەكىلدى ەرتەدەن بەلگىلى مۋزىكالىق اسپاپتاردىڭ ورىنداۋىنداعى شىعارمالار ءوزىنىڭ ۇلتتىق ناقىشىمەن ەرەكشەلەنەدى. كەيىننەن وركەستردىڭ اسپاپتار قۇرامى كەڭ شاناقتى جانە شىڭكىلدەك دومبىرالار، نار قوبىز، جەز قوبىز، مەس قوبىز، سازگەن، اسا شەرتەر، ادىرنا، داڭعىرا، ت.ب. مۋزىكالىق اسپاپتارمەن تولىقتىرىلدى.
رەپەرتۋارىندا حالىق كۇيلەرى «كەڭەس»، «سالكۇرەڭ»، «سارىوزەن»، حالىق كومپوزيتورلارىنىڭ تاتتىمبەتتىڭ «قوس باسار»، «سارىجايلاۋ»، «سىلقىلداق»; سۇگىردىڭ «كەر تولعاۋ»، «بەس جورعا»; ىقىلاستىڭ «ەردەن كۇيى»، «قامبار باتىر» ، وسى زامانعى قازاق كومپوزيتورلارىنىڭ م.تولەباەۆتىڭ «ەسكە الۋ»; ن.تىلەنديەۆتىڭ «اتا تولعاۋى»، «اڭساۋ»، «كوش كەرۋەن»; ك.كۇمىسبەكوۆتىڭ «فارابي سازى»، «قورقىت كۇيى» شىعارمالارى بار.
”ادىرنا” ۇلتتىق پورتالى
