پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين الەۋمەتتىك جەلىلەردەگى زاڭسىز لوتەرەيالار مەن ۇتىس ويىندارىن باقىلاۋدى كۇشەيتۋگە قاتىستى دەپۋتاتتاردىڭ ساۋالىنا جاۋاپ بەردى، دەپ حابارلايدى «ادىرنا» ءتىلشىسى.
ايتۋىنشا، قازاقستاندىق بلوگەرلەرگە قازنەتتە ۇتىس ويىندارىن وتكىزۋ زاڭسىز ەكەندىگى تۋرالى ءتۇسىندىرۋ جۇمىستارى جۇرگىزىلىپ جاتىر. ودان بولەك، زاڭبۇزۋشىلىقتاردى انىقتاۋ ءۇشىن ينتەرنەت كەڭىستىگى تاۋلىك بويى باقىلانادى.
«جىل باسىنان بەرى مونيتورينگ بارىسىندا 1870 ينتەرنەت-الاياقتىق فاكتىسى انىقتالدى.ونىڭ ىشىندە 389 فاكتى الەۋمەتتىك جەلىدە بولسا، 1480 رەسۋرس پەن سىلتەمەگە كىرۋگە شەكتەۋ قويىلعان. ونلاين-كازينو قىزمەتى بويىنشا 8616 جاعداي انىقتالدى، ونىڭ 6399-ى الەۋمەتتىك جەلىلەردە، 2195 ينتەرنەت-رەسۋرستار مەن سىلتەمەلەرگە شەكتەۋ قويىلدى. زاڭعا سايكەس، ينفليۋەنسەر (بلوگەر) – بەلگىسىز ادامدار توبىنا ارناپ ونلاين-پلاتفورمادا اقپارات جاريالايتىن جانە ونى كاسىپكەرلىك ماقساتتا پايدالاناتىن ادام. قازاقستان زاڭناماسى ينفليۋەنسەرلەردىڭ كاسىپكەرلىك قىزمەتىن رەتتەيدى جانە تسيفرلىق ورتاداعى زاڭسىز لوتەرەيالار مەن باسقا دا قۇقىق بۇزۋشىلىقتار ءۇشىن جاۋاپكەرشىلىك بەلگىلەيدى»،– دەدى شەنەۋنىك.
ول زاڭسىز لوتورەيا وتكىزگەندەرگە 100-دەن 2000 ايلىق ەسەپتىك كورسەتكىشكە دەيىنگى مولشەردە ايىپپۇل سالىنىپ، زاڭسىز تابىس تاركىلەنەتىنىن مالىمدەدى. جۇمانعارين قازىرگى ۋاقىتتا «ءساتتى جۇلدىز» اكتسيونەرلىك قوعامى عانا رەسمي لوتەرەيا وپەراتورى ەكەنىن اتاپ ءوتتى.
