قازاقستان پرەزيدەنتى قاسىم-جومارت توقاەۆ قازاقستاندىقتاردى قاسيەتتى رامازان ايىنىڭ اياقتالۋىمەن قۇتتىقتادى، دەپ حابارلايدى “ادىرنا” ۇلتتىق پورتالى.
مەملەكەت باسشىسى بۇل قاسيەتتى مەرەكەنىڭ كەلىسىم مەن دوستىقتى، مەيىرىم مەن ىزگىلىكتى دارىپتەيتىنىن اتاپ ءوتتى. ونىڭ ايتۋىنشا، رامازان ايىندا مۇسىلماندار رۋحاني تازارۋعا، ادامگەرشىلىك قاسيەتتەرىن ارتتىرۋعا ۇمتىلادى. ورازا ايت كۇنى جاماعات مول داستارحان جايىپ، قوناق شاقىرىپ، ءبىر-بىرىنە اقجارما تىلەكتەرىن ارنايدى، مۇقتاج جاندارعا قامقورلىق كورسەتەدى. بۇل يگى داستۇرلەر قوعامدا بيىك گۋمانيستىك قۇندىلىقتاردىڭ ورنىعۋىنا ىقپال ەتەدى.
“ورازا ايت مەرەكەسىنىڭ تاعىلىمى اتا سالتىمىزبەن تەرەڭ ساباقتاسىپ جاتىر. ءبىزدىڭ ءدىنىمىز دە، ءداستۇرىمىز دە ازاماتتاردى بىرلىك پەن ىنتىماققا ۇندەيدى، ءوزارا سىيلاس بولۋعا شاقىرادى. وسى قاسيەتتەرىمىز باردا حالقىمىزدىڭ ادىلەتتى، قاۋىپسىز، تازا ءارى قۋاتتى قازاقستاندى قۇرۋ تۋرالى ارمان-مۇراتى ورىندالاتىنىنا كامىل سەنىمدىمىن. بارشاڭىزعا باق-بەرەكە تىلەيمىن! ءار شاڭىراققا قۇت-بەرەكە دارىسىن!” – دەدى قاسىم-جومارت توقاەۆ.
