Qazaqstan Prezıdenti Qasym-Jomart Toqaev qazaqstandyqtardy qasıetti Ramazan aıynyń aıaqtalýymen quttyqtady, dep habarlaıdy “Adyrna” ulttyq portaly.
Memleket basshysy bul qasıetti merekeniń kelisim men dostyqty, meıirim men izgilikti dáripteıtinin atap ótti. Onyń aıtýynsha, Ramazan aıynda musylmandar rýhanı tazarýǵa, adamgershilik qasıetterin arttyrýǵa umtylady. Oraza aıt kúni jamaǵat mol dastarhan jaıyp, qonaq shaqyryp, bir-birine aqjarma tilekterin arnaıdy, muqtaj jandarǵa qamqorlyq kórsetedi. Bul ıgi dástúrler qoǵamda bıik gýmanıstik qundylyqtardyń ornyǵýyna yqpal etedi.
“Oraza aıt merekesiniń taǵylymy ata saltymyzben tereń sabaqtasyp jatyr. Bizdiń dinimiz de, dástúrimiz de azamattardy birlik pen yntymaqqa úndeıdi, ózara syılas bolýǵa shaqyrady. Osy qasıetterimiz barda halqymyzdyń Ádiletti, Qaýipsiz, Taza ári Qýatty Qazaqstandy qurý týraly arman-muraty oryndalatynyna kámil senimdimin. Barshańyzǵa baq-bereke tileımin! Ár shańyraqqa qut-bereke darysyn!” – dedi Qasym-Jomart Toqaev.
