وزبەكستان پرەزيدەنتى شاۆكات ميرزيوەۆ استانادا وتكەن RES 2026 وڭىرلىك ەكولوگيالىق سامميتىندە ەكولوگيا سالاسىنداعى وڭىرلىك ىنتىماقتاستىقتى كۇشەيتۋگە باعىتتالعان بىرقاتار باستامانى ۇسىندى، دەپ حابارلايدى «ادىرنا» ءتىلشىسى.
ءىس-شارا بارىسىندا ول بيوالۋانتۇرلىلىكتى ساقتاۋ ماقساتىندا ورتالىق ازيانىڭ قىزىل كىتابىن جاساۋدى ۇسىندى.
«بۇل جۇمىستىڭ ۇيلەستىرۋشىسى تاشكەنتتەگى حالىقارالىق تابيعاتتى قورعاۋ وداعىنىڭ وڭىرلىك كەڭسەسى بودا الادى. وڭىرلىك قىزىل كىتاپ تەك جويىلىپ بارا جاتقان تۇرلەردىڭ ءتىزىمى عانا ەمەس، وسى سالاداعى بىرلەسكەن جۇمىسىمىزعا ارنالعان ءتيىمدى پلاتفورماعا اينالۋى ءتيىس»، — دەدى شاۆكات ميرزيوەۆ.
سونداي-اق پرەزيدەنت ورتالىق ازياداعى اۋا ساپاسى ماسەلەلەرىمەن اينالىساتىن حالىقارالىق كونسورتسيۋم قۇرۋدى ۇسىندى. ونىڭ ايتۋىنشا، بۇل قۇرىلىم ونەركاسىپتى جاڭعىرتۋ مەن شىعارىندىلاردى تازارتۋ جۇيەلەرىن ەنگىزۋدى قوسا العاندا، قارجىلاندىرۋ ماسەلەلەرىمەن اينالىسۋى ءتيىس. ال تەحنولوگيالىق كوشۋ ۇدەرىسىن جەدەلدەتۋ ءۇشىن ورتالىق ازيادا «جاسىل» ساۋدا ءدالىزىن قالىپتاستىرۋ قاجەت ەكەنىن ايتتى.
بۇدان بولەك، وڭىردەگى قورشاعان ورتا وزگەرىستەرىنىڭ بىرىڭعاي اتلاسىن ازىرلەۋ قاجەتتىگى اتاپ ءوتىلدى. ول وڭىردەگى ۇدەرىستەردىڭ، سونىڭ ىشىندە جەردىڭ توزۋى ديناميكاسىن كورنەكى تۇردە كورسەتەتىن ىرگەلى عىلىمي بازا بولماق.
سونىمەن قاتار ميرزيوەۆ وڭىردەگى كليماتتىق جوبالاردىڭ بىرىڭعاي ينۆەستيتسيالىق پورترەتىن قالىپتاستىرۋ باستاماسىن كوتەردى. ونىڭ ايتۋىنشا، بۇل ەلدەرگە شاشىراڭقى باستامالارمەن ەمەس، تۇتاس وڭىرلىك ستراتەگيامەن ارەكەت ەتۋگە مۇمكىندىك بەرەدى.
