ارالاۋ بارىسىندا الدىمەن «قاينار-اكب» جشس ونەركاسىپتىك اككۋمۋلياتورلار شىعاراتىن جاڭا زاۋىتتا بولدى. قازىرگى كەزدە كاسىپورىندا جابدىقتاردى مونتاجداۋ جۇرگىزىلۋدە، مۇنان كەيىن ىسكە قوسۋ جۇمىستارى باستالادى. كاسىپورىندى بيىلعى ءىى توقسانىنىڭ ورتاسىندا ىسكە قوسۋ جوسپارلانسا، ال تولىق قۋاتىنا كەلەسى جىلى شىعادى دەپ مەجەلەنىپ وتىر.
كاسىپورىننىڭ باس ديرەكتورى ەربول اجماعامبەتوۆتىڭ ايتۋىنشا، ءبىرىنشى كەزەڭ ىسكە قوسىلعاننان كەيىن زاۋىتتىڭ قۋاتتىلىعى جىلىنا 100 مىڭ ونەركاسىپتىك اككۋمۋلياتور شىعارۋعا جەتەدى. قازىر 150 تۇراقتى جۇمىس ورنى قۇرىلعان، كەلەشەكتە جۇمىس ورىندارىنىڭ سانىن 300-گە دەيىن ۇلعايتپاق. بۇگىنگى كۇنى 10 ملرد. تەڭگە ينۆەستيتسيا تارتىلدى جانە كاسىپكەر مۇنىمەن شەكتەلىپ قالمايتىنىن ايتادى. كاسىپورىن ەكسپورتقا باعدارلانعان. سوندىقتان ونىمدەر تەك وتاندىق نارىققا عانا ەمەس، وزبەكستان، تۇرىكمەنستان، قىرعىز، ءازىربايجان، رەسەيگە دە جەتكىزىلمەكشى. تولىق قۋاتىنا شىققان كەزدە زاۋىتتا جىلىنا 200 مىڭنان استام ونەركاسىپ اككۋمۋلياتورى وندىرىلەدى.
جاقىن ارادا وبلىس ورتالىعىندا تاعى ءبىر جاڭا زاۋىت جۇمىسىن باستايدى. بۇل - «تالدىقورعان» يندۋستريالىق ايماعىنىڭ اۋماعىندا اۆتوكلاۆتى قاتايتاتىن گازبەتون بلوكتارىن شىعاراتىن كاسىپورىن. وندىرىستىك قۋاتى – جىلىنا 150 مىڭ م3. مامىردىڭ اياعى مەن ماۋسىمنىڭ باسىندا ىسكە قوسىلادى دەپ جوسپارلانعان.
- قاراۋسىز قالعان عيماراتتى ءوز جەكە قاراجاتىمىزعا ساتىپ الىپ، ءتيىستى رەكونسترۋكتسيا جۇرگىزدىك، قازىر قاجەتتى جابدىقتار ورناتىلۋدا. وڭىردە كىرپىشتىڭ وسى تۇرلەرىن وندىرەتىن كاسىپورىن جوق. ءبىز جەرگىلىكتى شيكىزاتتى قولدانامىز. نەگىزىنەن دايىن ءونىمدى وبلىس اۋماعىندا ساتامىز دەپ جوسپارلاپ وتىرمىز. زاۋىت عيماراتىنان باسقا كەڭسەمىز، قىزمەتكەرلەرگە ارنالعان اسحاناسى بار جاتاقحانامىز بار. قازىر 30 ادام جۇمىس ىستەيدى. زاۋىت ىسكە قوسىلعاننان كەيىن جۇمىس ورىندارىنىڭ سانى 70-كە دەيىن ۇلعايتامىز. جالاقىعا كەلسەك، كاسىپورىندا جۇمىسشىلار ايىنا 300-350 مىڭ تەڭگە، ال باس ەنەرگەتيك 1 ملن.تەڭگەگە دەيىن جالاقى الادى. جالپى،بۇل جوباعا ءوز قاراجاتىمىزدان شامامەن 3 ملرد. تەڭگە ينۆەستيتسيا سالدىق. بولاشاقتا مەملەكەت تاراپىنان قولداۋ بولسا، قۇرىلىسقا قاجەتتى قۇرعاق قوسپالار مەن ەمۋلسيا شىعاراتىن زاۋىت اشۋ جوسپارى بار. ءونىم تۇرلەرى نارىق تالاپتارىنا بايلانىستى بولادى، - دەدى ءوندىرىستى دامىتۋدىڭ جوسپارلارىمەن تانىستىرعان «ستالبەتون» جشس كوممەرتسيالىق ديرەكتورى دينارا ورىنباسار.
وبلىس اكىمى اتاپ وتكەندەي، مەملەكەت تاراپىنان ءتيىستى كومەك رەتىندە زاۋىت عيماراتىنا دەيىن ينجەنەرلىك ينفراقۇرىلىمدى جۇرگىزۋ ماسەلەسىندە قولداۋ كورسەتىلەتىن بولادى. سونداي-اق كاسىپكەرلىكتى قولداۋ باعدارلامالارىنىڭ ءبىرىن، سونىڭ ىشىندە جەڭىلدەتىلگەن نەسيەلەۋدى پايدالانۋ مۇمكىندىگى بار.
بەيبىت يساباەۆ كاسىپورىنداردى ارالاۋ بارىسىندا ەلەكتر قۋاتى 84 مۆت جانە جىلۋ قۋاتى 59 گكال/ساع بولاتىن «باسقۋات» قازاندىعى بازاسىندا بۋ-گاز ستانتسياسىن سالۋ جوباسىنىڭ ىسكە اسىرىلۋىمەن تانىستى. بۇل ستراتەگيالىق ماڭىزدى جوبا تالدىقورعان قالاسى تۇراقتى ءوسىپ كەلە جاتقاندىقتان، قالاداعى جىلۋ مەن ەلەكتر ەنەرگيالارىن تولىقتىرۋعا باعىتتالعان. مىسالى، بيىلدىڭ وزىندە قالادا كوپقاباتتى 27 ءۇي سالىنادى.
«باسقۋات ەنەرگوپروم» جشس باس ديرەكتورى ارمان وتارباەۆتىڭ ايتۋىنشا، جوبا بىرنەشە كەزەڭدە جۇزەگە اسىرىلادى. ءبىرىنشى كەزەڭ 35 مۆت ەلەكتر قۋاتىنا جانە 26 گكال/ساع جىلۋ قۋاتىنا ەسەپتەلگەن. بۇل رەتتە ءىى كەزەڭدى 2027 جىلدىڭ قاڭتار ايىنىڭ باسىندا اياقتاۋ جوسپارلانىپ وتىر. سونداي-اق گازبەن جابدىقتاۋعا جانە «باسقۋات» قازاندىعىنىڭ جىلۋ جەلىلەرىنە قوسىلۋعا تەحنيكالىق شارتتار بەرىلدى. جىلۋ تراسساسىن توسەۋ جۇمىستارى ءبىر ايدان كەيىن باستالىپ، قاراشا ايىنىڭ باسىندا اياقتالادى.
– ءبىزدىڭ باستى مىندەتىمىز - جىلۋ مەن ەلەكتر ەنەرگياسىن تولىقتىرا وتىرىپ، «باسقۋات» قازاندىعىنىڭ جۇكتەمەسىن ازايتۋ. ءسويتىپ وبلىس ورتالىعىنداعى جىلۋمەن جابدىقتاۋ جۇيەسىنىڭ بەرىكتىگىن قامتاماسىز ەتەمىز. جوبا ءبىزدىڭ كومپانيانىڭ جەكە ينۆەستيتسياسى ەسەبىنەن جۇرگىزىلىپ جاتىر، - دەدى ا.وتارباەۆ.
ايتا كەتەيىك، بۇگىنگى تاڭدا جوبانىڭ ءى كەزەڭى اياسىندا جوسپارلانعان جۇمىستاردىڭ 65% ورىندالعان.
جالپى جەتىسۋ وبلىسىندا 565 ونەركاسىپ ورنى جۇمىس ىستەيدى، ونىڭ 14-ءى ءىرى، 11-ءى ورتا كاسىپورىن. ونەركاسىپ ءوندىرىسىنىڭ كولەمى 2025 جىلعى قاڭتار-اقپان ايلارىندا 54,5 ملرد. تەڭگەنى قۇرادى، نكي – 120,9%. بۇل رەتتە ءوڭىر ونەركاسىبى كولەمىندەگى وڭدەۋ كاسىپورىندارىنىڭ ۇلەسى 68,2% قۇرايدى، ونىڭ ىشىندە تاماق، سۋسىندار ءوندىرىسى، ماشينا جاساۋ جانە جەڭىل ونەركاسىپ بار.
