بۇگىن، 27-ماۋسىم كۇنى ۇبت-دان 140 بالل يەگەرى انىقتالدى. الماتى وبلىسى، تالعار اۋدانى، قارابۇلاق اۋىلىنان شىققان رەكورد يەسى جاننۇر ەڭسەبەك “ادىرنا” تىلشىسىنە العاشقى سەزىمدەرىمەن ءبولىستى.
جاننۇر ۇلتتىق بىرىڭعاي تەستىلەۋدە ماكسيمالدى 140 بالدىڭ 140-ىن جيناپ، كوپتى ءتانتى ەتتى. اتاپ ايتقاندا، قازاقستان تاريحىنان - 20, وقۋ ساۋاتتىلىعى - 10, ماتەماتيكالىق ساۋاتتىلىق - 10, ەكى بەيىندىك پاننەن مۇمكىن بولعان 50 سۇراقتىڭ بارلىعىنا دۇرىس جاۋاپ بەرگەن.
جاننۇردىڭ تاڭداۋ ءپانى - ينفورماتيكا جانە ماتەماتيكا. ول تەستىلەۋگە دايىندىعىن 10-سىناپتان باستاعانىن ايتتى.
“قاڭتار ايىنداعى العاشقى ۇبت-دان 121 بالل يەلەندىم، 1 ايدان سوڭ ناۋرىز ايىندا سىنامالى ۇبت-دان 137 بالل جينادىم. بۇگىن، مىنە، سوڭعى مەجەدە ماكسيمالدى 140 ۇپايدى جيناۋدى بۇيىرىپتى. كەۋدەمدى قورقىنىش بيلەدى. دەسە دە دايىندىعىم جۇيەلى تۇردە بولدى. ءبىر كۇنىمدى بوس جىبەرمەي وقىپ، ەڭبەكتەندىم. 140 بالىمنىڭ قۇپياسى ساپالى ءبىلىم بەرگەن Juz40 ءبىلىم بەرۋ ورتالىعىندا دايىندالعانىمنىڭ ارقاسى،-” دەيدى ول.
سونداي-اق، ول العاشىندا ءوز ناتيجەسىن كورگەنىندە سەنبەگىنىن جەتكىزدى:
«ءوزىم 140 بالل مۇمكىن ەمەس دەپ ويلادىم. العاش ناتيجەمدى كورگەندە ورنىمنان اتىپ تۇردىم. بىراق مەن بۇل بالدى وزىمە ماقسات ەتكەن بولاتىنمىن. مەن ءۇشىن Juz40 ءبىلىم بەرۋ ورتالىعىنىڭ جىل باسىندا ۋادە ەتكەن Hyundai Sonato اۆتوكولىگى ۇلكەن موتيۆاتسيا بولدى” دەپ قوستى ول.
ايتا كەتەيىك، Juz40 ءبىلىم بەرۋ ورتالىعى وقۋ جىلىنىڭ باسىندا شەكتى 140 بالل جيناعان تۇلەككە سۋ جاڭا Hyundai Sonato كولىگىن سىيعا تارتۋدى ۋادە ەتكەن بولاتىن.
جاننۇر بولاشاقتا SDU ۋنيۆەرسيتەتىنە تاپسىرىپ، « اقپاراتتىق-تەحنولوگيالار» IT مامانى بولعىسى كەلەتىنىن ايتتى.
سونىمەن قاتار، قارابۇلاق اۋىلىنداعى N22 ورتا مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى، جاننۇردىڭ ۇستازى، سىنىپ جەتەكشىسى نۇرگۇل سەرىكقىزى شاكىرتىنىڭ كىشكەنتايىنان العىر، بىلىمگە قۇشتار، وقۋدان بولەك ونەرى كوپ ەكەننىن ايتتى:
“جاننۇر بىلىمگە قۇشتار، وتە سابىرلى بايسالدى، وزات وقۋشىم، التىن بەلگى يەگەرىم.
مەكتەپتە جان-جاقتى ءبىلىم مەن قاتار شاحمات ويناپ، دومبىرا شەرتكەندى ۇناتادى.
مىنەزى سالماقتى، ينفورماتيكا پانىنەن الماتى وبلىسى بويىنشا ءبىرىنشى ورىن يەگەرى، اۋىل وليمپياداسىنىڭ جەڭىمپازى. دايىندىعىنا وتە تياناقتى قارادى. ەرتەدەن-اق، ماماندىعىن تاڭداپ، دايىندىقتى باستاپ كەتكەن،-” دەدى نۇرگۇل كۇزەمباەۆا.
فاريزا قۇربانباەۆا
”ادىرنا” ۇلتتىق پورتالى
