قازاقستان رەسپۋبليكاسىنىڭ مەملەكەتتىك رامىزدەرى – ەگەمەندىگىمىز بەن ۇلتتىق بىرەگەيلىگىمىزدىڭ باستى بەلگىلەرى. ولار – تۋ، ەلتاڭبا جانە ءانۇران. مەملەكەتتىك رامىزدەر 1992 جىلى 4 ماۋسىمدا بەكىتىلدى. وسى كۇن قازاقستاندا مەملەكەتتىك رامىزدەر كۇنى رەتىندە اتاپ وتىلەدى.
كوك ءتۇستى تۋ – بەيبىتشىلىك پەن اشىق اسپاندى، ال ورتاسىنداعى التىن كۇن – ءومىر مەن ءوسىپ-وركەندەۋدى بىلدىرەدى. قىران قۇس – ەركىندىك پەن بيىك ماقساتتاردىڭ بەلگىسى. تۋدىڭ اۆتورى – شاكەن نيازبەكوۆ.
ەلتاڭبانىڭ ورتاسىندا شاڭىراق، ونىڭ اينالاسىندا ۋىقتار بەينەلەنگەن. بۇل – بىرلىكتى، ىنتىماقتى بىلدىرەدى. ونىڭ اۆتورلارى – جانداربەك مالىبەكوۆ پەن شوت-امان ءۋاليحانوۆ.
ال، ءانۇراننىڭ قازىرگى نۇسقاسى 2006 جىلى قابىلداندى. ونىڭ ءسوزى جۇمەكەن ناجىمەدەنوۆ پەن نۇرسۇلتان نازارباەۆقا، ءانى ءشامشى قالداياقوۆقا تيەسىلى.
قازىرگى تاڭدا قازاقستاندا مەملەكەتتىك رامىزدەردى ناسيحاتتاۋ بويىنشا ءتۇرلى شارالار ۇيىمداستىرىلىپ كەلەدى. جىل سايىن 4 ماۋسىمدا رەسپۋبليكالىق دەڭگەيدە ءىس-شارالار وتكىزىلەدى. وقۋ ورىندارىندا، مەملەكەتتىك مەكەمەلەردە، اسكەري بولىمدەردە جانە كاسىپورىنداردا مەملەكەتتىك تۋدىڭ كوتەرىلۋ راسىمدەرى وتەدى. سونداي-اق، جاستار اراسىندا پاتريوتتىق سەزىمدى وياتۋ ماقساتىندا كونكۋرستار، ۆيكتورينالار، فلەشموبتار جانە ارنايى دارىستەر ۇيىمداستىرىلادى.
ماسەلەن، 2024 جىلى رامىزدەر كۇنىندە 500-گە جۋىق ءىس-شارا وتكەن. قالا تۇرعىندارى مەن قوناقتارىنا 500 جالاۋ تەگىن تاراتىلىپ، تانىمال ارتىستەردىڭ قاتىسۋىمەن قونتسەرت ۇيىمداستىرىلعان. بىرلىك پەن وتانسۇيگىشتىكتى دارىپتەگەن جيىندارعا اسىرەسە جاستار بەلسەنە قاتىسۋدا. ولار ءانۇران ورىنداۋعا بۇكىل تۋىستارىن شاقىرىپ اكەلگەن. فورۋم اياسىندا تۋ شەرۋى دە وتكىزىلگەن. سونداي-اق، تالعات بيگەلدينوۆ اتىنداعى «جاس ۇلان» مەكتەبىنىڭ تاربيەلەنۋشىلەرى كوك بايراقتاردى جەلبىرەتىن ساپ ءتۇزىپ ءجۇرىپ ءوتتى.
مۇنداي ەرەكشە ءىس-شارالار ەلىمىزدىڭ تۇكپىر-تۇكپىرىندە وتكىزىلدى. ايرىقشا ەستە قالعانى قوناەۆ قالاسى. وندا پاراشيۋتشىلەر ەلىمىزدىڭ كوك بايراعىن كوكتە جەلبىرەتسە، 30 بايكەردەن تۇراتىن موتوتسيكلشىلەر شەرۋى جينالعان جۇرتشىلىققا مەرەكەلىك كوڭىل-كۇي سىيلادى.
بۇدان بولەك، رامىزدەردى قۇرمەتتەۋدى ارتتىرۋ ماقساتىندا بۇقارالىق اقپارات قۇرالدارىندا، الەۋمەتتىك جەلىلەردە ارنايى بەينەروليكتەر كورسەتىلىپ، ۇگىت-ناسيحات جۇمىستارى جۇرگىزىلەدى. جاڭا تۇرعىن ۇيلەردىڭ قاسبەتىنە مەملەكەتتىك تۋ ءىلۋ داستۇرگە اينالىپ كەلەدى.
مەملەكەتتىك رامىزدەردىڭ ماڭىزدىلىعىن ءتۇسىندىرۋ ماقساتىندا 2024 جىلى تەلەارنالاردا، راديوباعدارلامالاردا جانە الەۋمەتتىك جەلىلەردە اۋقىمدى اقپاراتتىق ناۋقاندار ۇيىمداستىرىلدى. بۇل شارالار قازاقستاننىڭ مەملەكەتتىك رامىزدەرىنە، ياعني تۋ، ەلتاڭبا جانە ءانۇراننىڭ تاريحى مەن ماڭىزدىلىعىن، سونداي-اق ولاردىڭ ەلدىڭ تاۋەلسىزدىگى مەن بىرلىگىن بەينەلەيتىن سيمۆوليكالىق ءمانىن كەڭىنەن تۇسىندىرۋگە باعىتتالدى.
ەلىمىزدە مەملەكەتتىك رامىزدەرىگە ۇقىپتى جانە قۇرمەتپەن قاراۋ قارقىندى تۇردە ناسيحاتتالعانىنا قاراماستان، ولارعا لايىقتى قۇرمەت كورسەتپەيتىندەر دە تابىلادى. قازاقستان رەسپۋبليكاسىنىڭ زاڭناماسىنا سايكەس، مەملەكەتتىك رامىزدەرگە قۇرمەتسىزدىك تانىتقان ازاماتتار اكىمشىلىك نەمەسە قىلمىستىق جاۋاپكەرشىلىككە تارتىلادى.
اكىمشىلىك قۇقىق بۇزۋشىلىق تۋرالى كودەكستىڭ 458-بابىنا سايكەس:
مەملەكەتتىك رامىزدەردى قورلاعاندارعا 200 اەك (ايلىق ەسەپتىك كورسەتكىش) كولەمىندە ايىپپۇل سالىنادى نەمەسە 15 تاۋلىككە دەيىن اكىمشىلىك قاماۋعا الىنادى.
ەگەر رامىزدەردى قورلاۋ اۋىر قۇقىق بۇزۋشىلىق رەتىندە تانىلسا، قىلمىستىق كودەكستىڭ 372-بابىنا سايكەس، كىنالى تۇلعاعا ءىرى كولەمدە ايىپپۇل سالىنىپ، 2 جىلعا دەيىن باس بوستاندىعىنان ايىرۋ جازاسى قولدانىلۋى مۇمكىن.
مەملەكەتتىك رامىزدەر – ءاربىر ازاماتتىڭ ماقتانىشى ءارى ۇلتتىق قۇندىلىق. ولاردى قۇرمەتتەۋ – ەلدى، ونىڭ تاريحىن جانە بولاشاعىن قۇرمەتتەۋ دەگەن ءسوز. ءاربىر قازاقستاندىق رامىزدەرگە قۇرمەتپەن قاراپ، ولاردىڭ ماڭىزىن ءتۇسىنىپ، كەلەر ۇرپاققا جەتكىزۋگە اتسالىسۋى قاجەت. تەك سوندا عانا ءبىز تاۋەلسىزدىگىمىزدى نىعايتىپ، ۇلتتىق رۋحىمىزدى كوتەرە الامىز.
