ستوكگولم قالاسىنداعى ايگىلى Jumbo Stay اۋە كەمەسىنەن جاسالعان قوناق ءۇي 2025 جىلدىڭ 17 ناۋرىزىندا رەسمي تۇردە جۇمىسىن توقتاتتى، دەپ حابارلايدى "ادىرنا" ۇلتتىق پورتالى Frequentflyers-كە سىلتەپ.
شۆەتسيا استاناسى ماڭىنداعى ارلاندا اۋەجايىندا ورنالاسقان ەرەكشە قوناق ءۇي 16 جىل بويى كەلۋشىلەردى قابىلداپ كەلگەن. الايدا جوبا يەسى قارجىلىق قيىندىقتارعا بايلانىستى بانكروتقا ۇشىراپ، مەملەكەتتىك Swedavia كومپانياسى جاڭا ينۆەستورعا جەردى جالعا بەرۋدەن باس تارتقان سوڭ، قوناقۇيدىڭ بولاشاعىنا نۇكتە قويىلدى. الداعى ۋاقىتتا Boeing 747-200 ۇشاعى بولشەكتەلۋى مۇمكىن.
Jumbo Stay قوناق ءۇيى بۇرىنعى Boeing 747-200 ۇشاعىنىڭ نەگىزىندە جاسالعان. بۇل ۇشاق العاش رەت 1976 جىلى Singapore Airlines اۆياكومپانياسىندا قىزمەت ەتىپ، 2002 جىلى شۆەتسيانىڭ Transjet اۋە كومپانياسى بانكروتقا ۇشىراعاننان كەيىن پايدالانۋدان شىعارىلعان. كەيىن ونى قايتا جوندەپ، 2009 جىلى ەرەكشە قوناق ۇيگە اينالدىردى.
وتەلدە 33 بولمە بولدى. ولاردىڭ اراسىندا قاراپايىم كايۋتالاردان باستاپ، ۇشقىشتار كابيناسىنداعى ليۋكس نومىرگە دەيىن ءارتۇرلى ساناتتاعى بولمەلەر ۇسىنىلدى. قوناقۇي ينتەرەرى اۆياتسيا ستيلىندە جاسالىپ، جولاۋشىلارعا ۇشاقتاعى اتموسفەرانى سەزىنۋگە مۇمكىندىك بەردى. ءتىپتى، قوناقتاردى «ۇشۋ گۇلىنە» ەلىكتەيتىن ارنايى دىبىسپەن وياتۋ قىزمەتى دە بولعان. بۇل ەرەكشەلىكتەر Jumbo Stay-ءدى اۆياتسيا جانكۇيەرلەرى مەن بلوگەرلەر اراسىندا تانىمال ەتتى.
Jumbo Stay قوناقۇيى تەك شۆەتسيادا عانا ەمەس، الەمدە دە ەرەكشە كونتسەپتسياسىمەن تانىمال بولدى. مۇنداي تاجىريبەلەر باسقا ەلدەردە دە كەزدەسەدى. مىسالى، كوستا-ريكاداعى Hotel Costa Verde Boeing 727 ۇشاعىنان جاسالعان، ال بالي ارالىندا رەسەيلىك ينۆەستور Boeing 737-ءنى ءساندى ۆيللاعا اينالدىرعان. بىراق بۇل جوبالاردىڭ بارلىعى ليۋكس ساناتىندا بولعاندىقتان، بيۋدجەتتىك ساياحاتشىلارعا ارنالعان ۇشاق-قوناق ءۇي نارىعىندا Jumbo Stay جالعىز بولدى.
پاندەميادان كەيىن وتەلگە كەلۋشىلەر سانى ايتارلىقتاي ازايدى. سونداي-اق، اۋەجاي اۋماعىندا جارناما جاساۋعا تىيىم سالىنعاندىقتان، قوناق ءۇي كەزدەيسوق كەلۋشىلەردى دە جوعالتتى. ونىڭ ۇستىنە، قولجەتىمدى باعاداعى قوناق ۇيلەردىڭ كوبەيۋى تۋريستەردىڭ تاڭداۋى مەن سۇرانىسىنا اسەر ەتتى. جاعدايدى تۇراقتاندىرۋ ءۇشىن جاڭا ينۆەستورلار ىزدەستىرىلگەنىمەن، Swedavia كومپانياسى جەر تەلىمىن باسقا ماقساتتا پايدالانۋدى ءجون كوردى.
وسىلايشا، الەمدەگى ەرەكشە قوناق ۇيلەردىڭ ءبىرى بولىپ سانالاتىن Jumbo Stay تاريح ساحناسىنان كەتۋگە ءماجبۇر بولدى. الداعى ۋاقىتتا ونىڭ بولشەكتەلۋى نەمەسە باسقا ماقساتتا پايدالانىلۋى مۇمكىن ەكەنى ايتىلۋدا.
