استانانىڭ ەسىل اۋدانىنداعى ەسىل وزەنىنىڭ ورتاسىنداعى «جاسىل» ارال نۇرسۇلتان نازارباەۆتىڭ مەنشىگىنە قايتا ورالدى، دەپ حابارلايدى "ادىرنا" ۇلتتىق پورتالى Orda.kz-كە سىلتەمە جاساپ.
بۇل اۋماق سوڭعى 20 جىل بويى نۇرسۇلتان جانە بولات نازارباەۆتارعا تيەسىلى بولعان. 2007 جىلى اكىمدىك جەر تەلىمىن سول كەزدەگى مەملەكەت باسشىسىنا سىيعا بەردى، ال 2009 جىلى ول ارالدىڭ ءبىر بولىگىن تۋعان ءىنىسى بولاتقا تاپسىردى.
2022 جىلعى قاڭتار وقيعاسىنان كەيىن، نۇرسۇلتان نازارباەۆ ءوزىنىڭ ارالداعى ۇلەسىن ۇلى تاۋمانعا، ال بولات نازارباەۆ ءوز بولىگىن بالالارى نۇربول مەن قۇنعىزدىڭ اتىنا راسىمدەدى. الايدا، بۇگىندە بۇل جەر تەلىمدەرىنىڭ يەلەرى وزگەرگەن.
2010-جىلداردىڭ باسىنان بەرى ارال اۋماعىن پوليتسيا تاۋلىك بويى كۇزەتەدى. وندا باقىلاۋ بەكەتتەرى ورناتىلعان، بوگدە ادامداردىڭ كىرۋىنە تىيىم سالىنعان. ارالعا ەكى جول اپارادى: سول جاعالاۋداعى جول كۇزەتىلسە، وڭ جاعالاۋداعى جول تەك ارنايى ادامدارعا عانا قولجەتىمدى. ارالدىڭ باسىم بولىگىن بيىك قورشاۋ قورشاپ تۇر، ونىڭ ىشىندە ءزاۋلىم سارايلار، تىكۇشاق قوناتىن الاڭ جانە جەكە شاعىن ورمان ورنالاسقان. قازىرگى تاڭدا ارال ءالى دە قاتاڭ كۇزەتىلۋدە، بىراق نازارباەۆتار اۋلەتىنەن كىمنىڭ ول جەردە تۇراتىنى بەلگىسىز.
ارالدىڭ نازارباەۆتارعا تيەسىلى ەمەس بولىگى بۇعان دەيىن قازاقستان رەسپۋبليكاسى پرەزيدەنتى ءىس باسقارماسىنا قاراستى بولعان. الايدا، جاقىندا بۇل جەر تەلىمىنىڭ يەسى وزگەردى. كاداسترلىق كارتاداعى دەرەكتەرگە سۇيەنسەك، ەندى نۇربول جانە قۇندىز نازارباەۆالاردىڭ جەر تەلىمدەرى «Smart Investment» جشس-نە تيەسىلى. بۇل كومپانيانى «بايتاۋ» جەكە دامۋ قورى قۇرعان، ال ول ءوز كەزەگىندە نۇرسۇلتان نازارباەۆتىڭ قورلار جۇيەسىنە كىرەدى. كومپانيانىڭ كەڭسەسى دە ەكس-پرەزيدەنتتىڭ كەڭسەسى ورنالاسقان عيماراتتا – استاناداعى تۇڭعىش پرەزيدەنت كىتاپحاناسىندا ورنالاسقان.
وسىلايشا، جەر تەلىمى قايتادان نۇرسۇلتان نازارباەۆتىڭ مەنشىگىنە ءوتتى.
قازىرگى تاڭدا بۇكىل ارال نۇرسۇلتان نازارباەۆقا جانە ونىڭ ۇلىنا تيەسىلى. كاداسترلىق كارتاداعى مالىمەتتەر بويىنشا، ارالدىڭ قالعان بولىگى بەلگىسىز جەكە تۇلعاعا تيەسىلى. بىراق ونىڭ تاۋمان نازارباەۆ بولۋى ىقتيمال.
سونداي-اق، بۇعان دەيىن پرەزيدەنت ءىس باسقارماسىنا تيەسىلى بولعان ارالدىڭ شىعىس بولىگىنىڭ كاداسترلىق دەرەكتەرى كارتادان الىنىپ تاستالعان. بۇرىن بۇل بولىك كارتادا ارنايى كاداسترلىق نومىرمەن كورسەتىلىپ، ونىڭ يەسى بەلگىلى بولسا، قازىر بۇل تەلىم مۇلدە تىركەلمەگەن بولىپ كورىنەدى.
