Astananyń Esil aýdanyndaǵy Esil ózeniniń ortasyndaǵy «Jasyl» aral Nursultan Nazarbaevtyń menshigine qaıta oraldy, dep habarlaıdy "Adyrna" ulttyq portaly Orda.kz-ke silteme jasap.
Bul aýmaq sońǵy 20 jyl boıy Nursultan jáne Bolat Nazarbaevtarǵa tıesili bolǵan. 2007 jyly ákimdik jer telimin sol kezdegi memleket basshysyna syıǵa berdi, al 2009 jyly ol araldyń bir bóligin týǵan inisi Bolatqa tapsyrdy.
2022 jylǵy Qańtar oqıǵasynan keıin, Nursultan Nazarbaev óziniń araldaǵy úlesin uly Taýmanǵa, al Bolat Nazarbaev óz bóligin balalary Nurbol men Qunǵyzdyń atyna rásimdedi. Alaıda, búginde bul jer telimderiniń ıeleri ózgergen.
2010-jyldardyń basynan beri aral aýmaǵyn polıııa táýlik boıy kúzetedi. Onda baqylaý beketteri ornatylǵan, bógde adamdardyń kirýine tyıym salynǵan. Aralǵa eki jol aparady: sol jaǵalaýdaǵy jol kúzetilse, oń jaǵalaýdaǵy jol tek arnaıy adamdarǵa ǵana qoljetimdi. Araldyń basym bóligin bıik qorshaý qorshap tur, onyń ishinde záýlim saraılar, tikushaq qonatyn alań jáne jeke shaǵyn orman ornalasqan. Qazirgi tańda aral áli de qatań kúzetilýde, biraq Nazarbaevtar áýletinen kimniń ol jerde turatyny belgisiz.
Araldyń Nazarbaevtarǵa tıesili emes bóligi buǵan deıin Qazaqstan Respýblıkasy Prezıdenti Is basqarmasyna qarasty bolǵan. Alaıda, jaqynda bul jer teliminiń ıesi ózgerdi. Kadastrlyq kartadaǵy derekterge súıensek, endi Nurbol jáne Qundyz Nazarbaevalardyń jer telimderi «Smart Investment» JShS-ne tıesili. Bul kompanııany «Baıtaý» jeke damý qory qurǵan, al ol óz kezeginde Nursultan Nazarbaevtyń qorlar júıesine kiredi. Kompanııanyń keńsesi de eks-prezıdenttiń keńsesi ornalasqan ǵımaratta – Astanadaǵy Tuńǵysh Prezıdent kitaphanasynda ornalasqan.
Osylaısha, jer telimi qaıtadan Nursultan Nazarbaevtyń menshigine ótti.
Qazirgi tańda búkil aral Nursultan Nazarbaevqa jáne onyń ulyna tıesili. Kadastrlyq kartadaǵy málimetter boıynsha, araldyń qalǵan bóligi belgisiz jeke tulǵaǵa tıesili. Biraq onyń Taýman Nazarbaev bolýy yqtımal.
Sondaı-aq, buǵan deıin prezıdent Is basqarmasyna tıesili bolǵan araldyń shyǵys bóliginiń kadastrlyq derekteri kartadan alynyp tastalǵan. Buryn bul bólik kartada arnaıy kadastrlyq nómirmen kórsetilip, onyń ıesi belgili bolsa, qazir bul telim múlde tirkelmegen bolyp kórinedi.
