مادەنيەت جانە اقپارات ءمينيسترى ايدا بالاەۆا سوڭعى ۋاقىتتا قوعامدا قىزۋ تالقىلانىپ جاتقان «قازاقفيلم» كينوستۋدياسىنا قاتىستى پىكىر ءبىلدىردى.
ونىڭ ايتۋىنشا، ستۋدياعا تيەسىلى جەر ساتىلماعان، ال كينوستۋديانى استاناعا كوشىرۋ تۋرالى اقپارات شىندىققا جاناسپايدى.
مينيستر «قازاقفيلمنىڭ» جەرى كينوستۋديا يەلىگىندە قالا بەرەتىنىن جانە تەك كينەماتوگرافيا مۇددەسى ءۇشىن پايدالانىلاتىنىن ايتتى.
"بۇل ماسەلە توڭىرەگىندەگى نەگىزسىز قاۋەسەت ءبىرجولا توقتاتىلۋى ءتيىس. «قازاقفيلمگە» تيەسىلى جەرلەر كينوستۋديا يەلىگىندە قالا بەرەدى. جەر ساتىلعان جوق جانە تەك كينەماتوگرافيا مۇددەسى ءۇشىن پايدالانىلۋدا", – دەدى ايدا بالاەۆا.
كينوستۋديانى جوندەۋگە قوماقتى قارجى سالۋعا دايىن ينۆەستورلاردىڭ بار ەكەنى تۋرالى اقپارات ناقتى ەمەس. مينيسترلىكتىڭ ايتۋىنشا، ەشقانداي رەسمي ۇسىنىس نەمەسە كەپىلدىك حات تۇسپەگەن.
"بۇل اقپارات قوعامدا كەڭ تاراپ ءجۇر، الايدا مۇنداي مالىمدەمەلەردى قۇجاتتارمەن نەمەسە ناقتى كەپىلدىكتەرمەن راستاي المايتىن ادامدار جاساپ وتىر. مەملەكەت، ياعني مادەنيەت جانە اقپارات مينيسترلىگى ناقتى ينۆەستورلارمەن جۇمىس ىستەۋگە دايىن. دەگەنمەن ازىرگە ەشقانداي ناقتى ۇسىنىس، بىردە-ءبىر كەپىلدىك حاتى جوق. بارلىعى تەك اڭگىمە دەڭگەيىندە", – دەدى مينيستر.
«قازاقفيلم» كينوستۋدياسىن ەلورداعا كوشىرۋ تۋرالى قاۋەسەت نەگىزسىز. الايدا «قازاقانيماتسيا» شىعارماشىلىق بىرلەستىگىن استاناعا ورنالاستىرۋ ماسەلەسى قارالىپ جاتىر. بۇل شەشىم وتاندىق انيماتسيا يندۋسترياسىن دامىتۋ ماقساتىندا قابىلدانعان.
"قازىرگى ۋاقىتتا ەلورداعا «قازاقانيماتسيا» شىعارماشىلىق بىرلەستىگىن كوشىرۋ مۇمكىندىگى قاراستىرىلىپ جاتىر. بۇل ماڭىزدى جايت – «قازاقانيماتسيا» وندىرىستىك بازا ەمەس، انيماتسيالىق كونتەنت جاساۋعا تاپسىرىستاردى بولەتىن قۇرىلىم. سوندىقتان ونىڭ استاناعا كوشۋى سالانىڭ جۇمىسىنا ەش كەدەرگى كەلتىرمەيدى", – دەپ ءتۇسىندىردى ايدا بالاەۆا.
ءمينيستردىڭ ايتۋىنشا، پرەزيدەنت قول قويعان جاڭا زاڭعا سايكەس كينويندۋستريانى دامىتۋعا جىل سايىن بولىنەتىن قارجىنىڭ كەمىندە 30%-ى «قازاقفيلمگە» باعىتتالادى. سونىمەن قاتار، كينوستۋديا حالىقارالىق ارىپتەستەرمەن بىرلەسىپ فيلمدەر ءتۇسىرىپ، قازاقستاندىق كينونى الەمدىك دەڭگەيدە تانىتۋعا كۇش سالماق.
"«قازاقفيلم» – جاي عانا كينوستۋديا ەمەس، بۇل – قازاق مادەنيەتىنىڭ سيمۆولى. سوندىقتان ونى دامىتۋ – باسىم باعىتتىڭ ءبىرى", – دەدى مينيستر.
قازىرگى تاڭدا دەمەۋشىلەردىڭ كومەگىمەن كينوستۋديادا سوڭعى 15 جىلدا جۇرگىزىلمەگەن جوندەۋ جۇمىستارى باستالدى. ايدا بالاەۆا «قازاقفيلمدى» كاسىبي مەنەدجەر باسقارۋى ءتيىس ەكەنىن جانە مينيسترلىك كينوستۋديانى دامىتۋعا جان-جاقتى قولداۋ كورسەتەتىنىن اتاپ ءوتتى.
"مينيسترلىك بۇل كاسىپورىندى رەجيسسەر نەمەسە اكتەر ەمەس، كينوستۋديا قىزمەتىن تابىستى ءارى ءتيىمدى جۇرگىزۋگە قابىلەتتى كاسىبي مەنەدجەر باسقارۋى ءتيىس دەگەن قاعيدانى بەرىك ۇستانادى", – دەدى بالاەۆا.
