Mádenıet jáne aqparat mınıstri Aıda Balaeva sońǵy ýaqytta qoǵamda qyzý talqylanyp jatqan «Qazaqfılm» kınostýdııasyna qatysty pikir bildirdi.
Onyń aıtýynsha, stýdııaǵa tıesili jer satylmaǵan, al kınostýdııany Astanaǵa kóshirý týraly aqparat shyndyqqa janaspaıdy.
Mınıstr «Qazaqfılmniń» jeri kınostýdııa ıeliginde qala beretinin jáne tek kınematografııa múddesi úshin paıdalanylatynyn aıtty.
"Bul másele tóńiregindegi negizsiz qaýeset birjola toqtatylýy tıis. «Qazaqfılmge» tıesili jerler kınostýdııa ıeliginde qala beredi. Jer satylǵan joq jáne tek kınematografııa múddesi úshin paıdalanylýda", – dedi Aıda Balaeva.
Kınostýdııany jóndeýge qomaqty qarjy salýǵa daıyn ınvestorlardyń bar ekeni týraly aqparat naqty emes. Mınıstrliktiń aıtýynsha, eshqandaı resmı usynys nemese kepildik hat túspegen.
"Bul aqparat qoǵamda keń tarap júr, alaıda mundaı málimdemelerdi qujattarmen nemese naqty kepildiktermen rastaı almaıtyn adamdar jasap otyr. Memleket, ıaǵnı Mádenıet jáne aqparat mınıstrligi naqty ınvestorlarmen jumys isteýge daıyn. Degenmen ázirge eshqandaı naqty usynys, birde-bir kepildik haty joq. Barlyǵy tek áńgime deńgeıinde", – dedi mınıstr.
«Qazaqfılm» kınostýdııasyn elordaǵa kóshirý týraly qaýeset negizsiz. Alaıda «Qazaqanımaııa» shyǵarmashylyq birlestigin Astanaǵa ornalastyrý máselesi qaralyp jatyr. Bul sheshim otandyq anımaııa ındýstrııasyn damytý maqsatynda qabyldanǵan.
"Qazirgi ýaqytta elordaǵa «Qazaqanımaııa» shyǵarmashylyq birlestigin kóshirý múmkindigi qarastyrylyp jatyr. Bul mańyzdy jaıt – «Qazaqanımaııa» óndiristik baza emes, anımaııalyq kontent jasaýǵa tapsyrystardy bóletin qurylym. Sondyqtan onyń Astanaǵa kóshýi salanyń jumysyna esh kedergi keltirmeıdi", – dep túsindirdi Aıda Balaeva.
Mınıstrdiń aıtýynsha, Prezıdent qol qoıǵan jańa zańǵa sáıkes kınoındýstrııany damytýǵa jyl saıyn bólinetin qarjynyń keminde 30%-y «Qazaqfılmge» baǵyttalady. Sonymen qatar, kınostýdııa halyqaralyq áriptestermen birlesip fılmder túsirip, qazaqstandyq kınony álemdik deńgeıde tanytýǵa kúsh salmaq.
"«Qazaqfılm» – jaı ǵana kınostýdııa emes, bul – qazaq mádenıetiniń sımvoly. Sondyqtan ony damytý – basym baǵyttyń biri", – dedi mınıstr.
Qazirgi tańda demeýshilerdiń kómegimen kınostýdııada sońǵy 15 jylda júrgizilmegen jóndeý jumystary bastaldy. Aıda Balaeva «Qazaqfılmdi» kásibı menedjer basqarýy tıis ekenin jáne mınıstrlik kınostýdııany damytýǵa jan-jaqty qoldaý kórsetetinin atap ótti.
"Mınıstrlik bul kásiporyndy rejısser nemese akter emes, kınostýdııa qyzmetin tabysty ári tıimdi júrgizýge qabiletti kásibı menedjer basqarýy tıis degen qaǵıdany berik ustanady", – dedi Balaeva.
