بەلگىلى سپورتشى، ءماجىلىس دەپۋتاتى داۋلەت تۇرلىحانوۆ ازيا كۇرەس فەدەراتسياسى (UWW Azia) پرەزيدەنتتىگىنەن كەتتى، دەپ حابارلايدى “ادىرنا” ۇلتتىق پورتالى.
يوردانيا استاناسى اممان قالاسىندا وتكەن فەدەراتسيانىڭ باس اسسامبلەياسىندا اتالعان قىزمەتكە جاڭا باسشى تاعايىندالدى. ەندى بۇل مىندەتتى يوردانيالىق موحاممەد ءال-اۆامالا اتقاراتىن بولدى. ول 38 داۋىستىڭ 34-ءىن جينادى. ەندى يوردانيالىق مامان بۇل ۇيىمدى 2028 جىلعا دەيىن باسقارادى.
ايتا كەتسەك، داۋلەت تۇرلىحانوۆ اتالعان قىزمەتتى 2017 جىلدىڭ مامىرىنان اتقارىپ كەلدى.
سونداي-اق، يوردانيا استاناسى اممان قالاسىندا وتەتىن كۇرەس تۇرلەرىنەن ازيا چەمپيوناتىنا قاتىساتىن قازاقستان قۇراماسى بەلگىلى بولدى.
25-30 ناۋرىز ارالىعىندا وتەتىن ازيا چەمپيوناتىندا ەل قۇراماسى ەركىن، گرەك-ريم جانە ايەلدەر كۇرەسىنەن سىنعا تۇسەدى.
