24 ناۋرىزعا قاراعان ءتۇنى كراسنودار ولكەسىندەگى كاسپي قۇبىر كونسورتسيۋمىنىڭ (كقك) كروپوتكينسكايا مۇناي ايداۋ ستانتسياسىنا تاعى دا شابۋىل جاسالدى. بۇل تۋرالى رەسەيدىڭ قورعانىس مينيسترلىگى مالىمدەدى، دەپ حابارلايدى “ادىرنا”.
اقپاراتقا سايكەس، اۋە شابۋىلىنا قارسى قورعانىس جۇيەسى دروندى ستانتسيادان 7 شاقىرىم جەردە اتىپ ءتۇسىردى، ونىڭ قالدىقتارى كاۆكازسكايا تەمىرجول ستانتسياسىنىڭ ماڭىنا قۇلاعان.
بۇعان دەيىن، 19 ناۋرىزدا، كاۆكازسكايا ستانيتساسىنداعى مۇناي بازاسىنا دروندار شابۋىل جاساپ، ناتيجەسىندە مۇناي قويماسىنداعى رەزەرۆۋار بۇزىلىپ، ءورت شىققان. 21 ناۋرىزعا قاراعان ءتۇنى جارىلىس بولىپ، جانىپ جاتقان مۇناي توگىلدى. وقيعا سالدارىنان ەكى ءورت ءسوندىرۋشى جاراقات العان. ءورتتىڭ جالپى اۋماعى 10 مىڭ شارشى مەترگە جەتتى.
رەسەي قورعانىس مينيسترلىگى 19 ناۋرىزداعى شابۋىل ۆلاديمير پۋتين مەن اقش-تىڭ بۇرىنعى پرەزيدەنتى دونالد ترامپ اراسىنداعى تەلەفون اڭگىمەسىنەن بىرنەشە ساعات وتكەن سوڭ جاسالعانىن اتاپ ءوتتى. سول كەلىسسوزدەردەن كەيىن ماسكەۋ مەن كيەۆتىڭ 30 كۇن بويى ءبىر-ءبىرىنىڭ ەنەرگەتيكالىق ينفراقۇرىلىمىنا سوققى جاساماۋى تۋرالى ۋاعدالاستىققا قول جەتكىزىلگەن.
Bloomberg اگەنتتىگىنىڭ مالىمەتىنشە، ۋكراينا پرەزيدەنتى ۆلاديمير زەلەنسكي دە ترامپپەن سويلەسكەننەن كەيىن رەسەيدىڭ ەنەرگەتيكالىق نىساندارىنا سوققى بەرۋدى توقتاتۋعا كەلىسكەن.
ەسكە سالساق، 17 اقپاندا كروپوتكينسكايا ستانتسياسىنا دروندار شابۋىل جاساپ، بەكەتتىڭ جۇمىسى توقتاعان بولاتىن. كونسورتسيۋم شابۋىلدى «تەرروريستىك سوققى» دەپ اتادى.
