24 naýryzǵa qaraǵan túni Krasnodar ólkesindegi Kaspıı qubyr konsorıýmynyń (KQK) Kropotkınskaıa munaı aıdaý stanııasyna taǵy da shabýyl jasaldy. Bul týraly Reseıdiń Qorǵanys mınıstrligi málimdedi, dep habarlaıdy “Adyrna”.
Aqparatqa sáıkes, áýe shabýylyna qarsy qorǵanys júıesi drondy stanııadan 7 shaqyrym jerde atyp túsirdi, onyń qaldyqtary Kavkazskaıa temirjol stanııasynyń mańyna qulaǵan.
Buǵan deıin, 19 naýryzda, Kavkazskaıa stanıasyndaǵy munaı bazasyna drondar shabýyl jasap, nátıjesinde munaı qoımasyndaǵy rezervýar buzylyp, órt shyqqan. 21 naýryzǵa qaraǵan túni jarylys bolyp, janyp jatqan munaı tógildi. Oqıǵa saldarynan eki órt sóndirýshi jaraqat alǵan. Órttiń jalpy aýmaǵy 10 myń sharshy metrge jetti.
Reseı Qorǵanys mınıstrligi 19 naýryzdaǵy shabýyl Vladımır Pýtın men AQSh-tyń burynǵy prezıdenti Donald Tramp arasyndaǵy telefon áńgimesinen birneshe saǵat ótken soń jasalǵanyn atap ótti. Sol kelissózderden keıin Máskeý men Kıevtiń 30 kún boıy bir-biriniń energetıkalyq ınfraqurylymyna soqqy jasamaýy týraly ýaǵdalastyqqa qol jetkizilgen.
Bloomberg agenttiginiń málimetinshe, Ýkraına prezıdenti Vladımır Zelenskıı de Tramppen sóıleskennen keıin Reseıdiń energetıkalyq nysandaryna soqqy berýdi toqtatýǵa kelisken.
Eske salsaq, 17 aqpanda Kropotkınskaıa stanııasyna drondar shabýyl jasap, bekettiń jumysy toqtaǵan bolatyn. Konsorıým shabýyldy «terrorıstik soqqy» dep atady.
