اقمولا وبلىسىندا «ۆاز» جەڭىل كولىگى مەن «YUTONG» اۆتوبۋسى سوقتىعىستى. بۇل تۋرالى اقمولا وبلىستىق پوليتسيا دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” پورتالى قازاقپاراتقا سىلتەپ.
مالىمەت بويىنشا، جول-كولىك وقيعاسى 23 ناۋرىزدا «ستەپنوگورسك - زاۆودسكوي اۋىلى» اۆتوجولىندا بولعان. «ۆاز» ماركالى كولىكتىڭ جۇرگىزۋشىسى مەن ءۇش جولاۋشى العان جاراقاتتارىنان وقيعا ورنىندا قازا تاپتى. «ۆاز» ماركالى كولىكتىڭ ەكى كامەلەتكە تولماعان جولاۋشىسى ءارتۇرلى جاراقاتتارمەن مەديتسينالىق مەكەمەگە جاتقىزىلدى.
پوليتسەيلەر سوتقا دەيىنگى تەرگەپ-تەكسەرۋدى باستادى، ونىڭ قورىتىندىسى بويىنشا پروتسەسسۋالدىق شەشىم قابىلدانادى.
«مۇنداي وقيعالاردى بولدىرماۋ ءۇشىن جول قوزعالىسىنا قاتىسۋشىلارعا، اسىرەسە، كولىك قوزعالىسى قارقىندى جۇرەتىن جول ۋچاسكەلەرىندە جىلدامدىقتى قاتاڭ ساقتاۋ ۇسىنىلادى. سونىمەن قاتار، كولىكتەردىڭ تەحنيكالىق جاعدايىن ۇنەمى قاداعالاپ وتىرۋ قاجەت»، - دەپ اتاپ ءوتتى ستەپنوگورسك ۋنيتارلىق كاسىپورنىنىڭ باسشىسى تالعات ساقانوۆ.
