UFC-ءدىڭ بۇرىنعى چەمپيونى كونور ماكگرەگور 2025 جىلى وتەتىن يرلانديا پرەزيدەنتتىك سايلاۋىنا قاتىسۋعا نيەتتى ەكەنىن جاريالادى، دەپ حابارلايدى "ادىرنا" ۇلتتىق پورتالى.
ماكگرەگوردىڭ بۇل شەشىمى ەلدەگى كوشى-قون ساياساتىنا قاتىستى پىكىرتالاستارمەن بايلانىستى. ونىڭ ايتۋىنشا، يرلانديا 2026 جىلدىڭ 12 ماۋسىمىنا دەيىن ەۋروپالىق وداقتىڭ ميگراتسيالىق پاكتى اياسىنداعى بارلىق مىندەتتەمەلەرىن ورىنداۋعا مىندەتتى. بۇل مەرزىمگە دەيىن پارلامەنتتىڭ قوس پالاتاسى قاجەتتى زاڭ جوبالارىن قابىلداپ، ولاردى ەل پرەزيدەنتى بەكىتۋى ءتيىس. ال پرەزيدەنتتىك سايلاۋ 2025 جىلدىڭ 11 قاراشاسىنا دەيىن ءوتۋى كەرەك.
"ۇكىمەتكە مەنەن باسقا كىم قارسى شىعا الادى؟ ولار ۇسىناتىن كەز كەلگەن كانديدات بيلىككە توتەپ بەرە المايدى. ال مەن – بەرە الامىن! ەگەر مەن پرەزيدەنت بولسام، بۇل زاڭ جوباسىن رەفەرەندۋمعا شىعارار ەدىم. مەن بۇل پاكتقا تۇبەگەيلى قارسىمىن. بىراق بۇل شەشىم مەنىڭ نەمەسە ۇكىمەتتىڭ ەركىنە بايلانىستى ەمەس. مەن پرەزيدەنت بولعاندا، بۇل – يرلانديانىڭ بولاشاعى بولادى. ەل ازاماتتارىنىڭ ارقايسىسى ءوز پىكىرىن ايتىپ، بولاشاعىن ءوزى ايقىنداۋعا قۇقىلى!" – دەپ جازدى ماكگرەگور Instagram پاراقشاسىندا.
ايتا كەتەيىك، كونور ماكگرەگور يرلاندياداعى كوشى-قون ساياساتىنا قاتىستى قاتاڭ كوزقاراسىمەن تانىمال. ول ەلگە زاڭسىز ميگراتسيانىڭ قاۋىپ توندىرەتىنىن بىرنەشە رەت ايتقان. وسى ماسەلەگە بايلانىستى جۋىردا ول اقش-تىڭ بۇرىنعى پرەزيدەنتى دونالد ترامپپەن كەزدەسىپ، پىكىر الماسقان.
