22 ناۋرىزدا اقتاۋ قالاسىندا تاريحي ءسات ورىن الدى. قازاقتىڭ ۇلتتىق كيىمىن كيگەن 5500 ادام ءبىر مەزەتتە جينالىپ، «قازاق ۇلتتىق كيىممەن ەڭ كوپ ادام جينالىسى» نوميناتسياسى بويىنشا گيننەس رەكوردىن ورناتتى.
شاراعا ارنايى بارعان جۋرناليست الما سايلاۋقىزى Facebook پاراقشاسىندا جازبا جاريالادى.
ول قاتىسۋشىلاردان سۇحبات الىپ، اسەرىمەن بولىسكەن.
جينالعانداردىڭ ايتۋىنشا، ءىس-شارانى وتكىزۋدە جاڭبىر جاۋىپ، قيىندىقتار بولعان. الايدا جاڭبىر حالىقتىڭ كوتەرىڭكى كوڭىل كۇيىنە اسەر ەتپەگەن.
شاراعا قاتىسقان اقتاۋ تۇرعىنى ءوزىنىڭ اسەرىن جەتكىزدى.
“قازاقتىڭ ۇلتتىق كيىمى ەندى گيننەس رەكوردتار كىتابىندا بار! پاتريوتتىق سەزىم وتە جوعارى، شىنىمدى ايتسام. جاڭبىر ەشقانداي جوسپارىمىزدى بۇزعان جوق. كوڭىل كۇيىمىز دە تاماشا. ءبارىمىز ءبىر قولشاتىردىڭ استىندا جىلىنىپ، ءان ايتىپ، بي بيلەدىك. مەن 3997-ءشى بولىپ تىركەلگەنمىن”، - دەدى.
جينالعانداردىڭ قاتارىندا قازاق حالقىنىڭ مادەنيەتىنە قىزىعۋشىلىق تانىتقان وزگە ۇلت وكىلدەرى دە بولدى. سولاردىڭ ءبىرى – قازاقى ناقىشتا كيىنگەن تاتيانا ەسىمدى تۇرعىن.
“بۇگىنگى كوڭىل كۇي تاماشا! قانشاما ادەمى ايەلدەر مەن ەر ادامدار ءجۇر. شىنىمەن وسى رەكوردتىڭ بولعانىن قالادىم. قازاقستاننىڭ گيننەس رەكوردتار كىتابىندا بولۋىن قالادىم. مەنىڭ بىلۋىمشە، ماڭعىستاۋدا ءاربىر وتباسىندا، ءار ايەل مەن قىز بالاسىندا ۇلتتىق كيىم بار. ماعان سولاي ايتتى. ناۋرىز قۇتتى بولسىن!” – دەپ اسەرىمەن ءبولىستى.
ءىس-شاراعا قاتىسقان اپالى-ءسىڭلى ءىزىمحان مەن نىسانكۇل بۇل رەكوردتىڭ بولاشاق ۇرپاق ءۇشىن ماڭىزى زور ەكەنىن ايتتى.
“اسەرىمىز وتە كەرەمەت. بارلىعى كۇشتى ءوتتى. رۋحىمىز كوتەرىلدى. ءوزىڭنىڭ شىققان جەرىڭدى، تەگىڭدى، قازاق ەكەنىڭدى الەمگە اتىڭ قالاتىنداي ىسكە نەگە ارالاسپاسقا؟” - دەيدى ولار.
ۇلتتىق مادەنيەتتى الەمگە تانىتۋداعى بۇل باستاما الداعى ۋاقىتتا دا جالعاسادى دەپ كۇتىلۋدە.
