22 naýryzda Aqtaý qalasynda tarıhı sát oryn aldy. Qazaqtyń ulttyq kıimin kıgen 5500 adam bir mezette jınalyp, «Qazaq ulttyq kıimmen eń kóp adam jınalysy» nomınaııasy boıynsha Gınnes rekordyn ornatty.
Sharaǵa arnaıy barǵan jýrnalıst Alma Saılaýqyzy Facebook paraqshasynda jazba jarııalady.
Ol qatysýshylardan suhbat alyp, áserimen bólisken.
Jınalǵandardyń aıtýynsha, is-sharany ótkizýde jańbyr jaýyp, qıyndyqtar bolǵan. Alaıda jańbyr halyqtyń kóterińki kóńil kúıine áser etpegen.
Sharaǵa qatysqan Aqtaý turǵyny óziniń áserin jetkizdi.
“Qazaqtyń ulttyq kıimi endi Gınnes rekordtar kitabynda bar! Patrıottyq sezim óte joǵary, shynymdy aıtsam. Jańbyr eshqandaı josparymyzdy buzǵan joq. Kóńil kúıimiz de tamasha. Bárimiz bir qolshatyrdyń astynda jylynyp, án aıtyp, bı bıledik. Men 3997-shi bolyp tirkelgenmin”, - dedi.
Jınalǵandardyń qatarynda qazaq halqynyń mádenıetine qyzyǵýshylyq tanytqan ózge ult ókilderi de boldy. Solardyń biri – qazaqy naqyshta kıingen Tatıana esimdi turǵyn.
“Búgingi kóńil kúı tamasha! Qanshama ádemi áıelder men er adamdar júr. Shynymen osy rekordtyń bolǵanyn qaladym. Qazaqstannyń Gınnes rekordtar kitabynda bolýyn qaladym. Meniń bilýimshe, Mańǵystaýda árbir otbasynda, ár áıel men qyz balasynda ulttyq kıim bar. Maǵan solaı aıtty. Naýryz qutty bolsyn!” – dep áserimen bólisti.
Is-sharaǵa qatysqan apaly-sińli Izimhan men Nysankúl bul rekordtyń bolashaq urpaq úshin mańyzy zor ekenin aıtty.
“Áserimiz óte keremet. Barlyǵy kúshti ótti. Rýhymyz kóterildi. Ózińniń shyqqan jerińdi, tegińdi, qazaq ekenińdi álemge atyń qalatyndaı iske nege aralaspasqa?” - deıdi olar.
Ulttyq mádenıetti álemge tanytýdaǵy bul bastama aldaǵy ýaqytta da jalǵasady dep kútilýde.
