فوتو: Global Look Press
بۇگىن تۇننەن باستاپ ماسكەۋ قالاسى مەن وبلىسىنا باعىتتالعان ۇشقىشسىز ۇشۋ اپپاراتتارىنىڭ جاپپاي شابۋىلى تىركەلدى. رەسەي تاراپى بۇل شابۋىلدى سوڭعى ءبىر جىلدان استام ۋاقىت ىشىندەگى ەڭ ءىرى اۋە شابۋىلدارىنىڭ ءبىرى دەپ باعالاپ وتىر.
ماسكەۋ مەرى سەرگەي سوبيانين جاريالاعان مالىمەتتەرگە سايكەس، تاۋلىك باستالعالى اۋە قورعانىسى كۇشتەرى استاناعا باعىتتالعان 81 دروندى اتىپ تۇسىرگەن. ال سوڭعى ءبىر تاۋلىكتىڭ ىشىندە جويىلعان ۇشقىشسىز اپپاراتتاردىڭ جالپى سانى 120-دان اسقان.
رەسەيلىك تاسس اگەنتتىگىنىڭ حابارلاۋىنشا، بۇل – 2026 جىلعى ەڭ اۋقىمدى شابۋىلداردىڭ ءبىرى. بۇعان دەيىن ەڭ ءىرى درون شابۋىلى 14 ناۋرىزدا تىركەلگەن بولاتىن. ول كەزدە ماسكەۋ ماڭىندا 65 درون جويىلعانى حابارلانعان ەدى.
سونىمەن قاتار رەسەي قورعانىس مينيسترلىگى ەلدىڭ ءارتۇرلى ايماقتارىنىڭ ۇستىندە ءبىر ءتۇن ىشىندە 550-دەن استام ۇشقىشسىز اپپاراتتىڭ زالالسىزداندىرىلعانىن مالىمدەدى. ۆەدومستۆونىڭ دەرەگىنشە، اۋە شابۋىلىنا قارسى قورعانىس جۇيەلەرى بىرنەشە وڭىردە كۇشەيتىلگەن رەجيمدە جۇمىس ىستەگەن.
رەسمي اقپارات بويىنشا، ماسكەۋگە جاقىنداعان كەزدە ۋكراينا قارۋلى كۇشتەرىنە تيەسىلى بىرنەشە درون جويىلعان. الدىمەن ءبىر اپپارات اتىپ تۇسىرىلسە، كەيىن تاعى التى دروننىڭ كوزىن جويۋعا مۇمكىندىك تۋعان.
قازىرگى ۋاقىتتا شابۋىل سالدارىنان زارداپ شەككەندەر مەن ينفراقۇرىلىمعا كەلگەن شىعىن كولەمى تۋرالى ناقتى مالىمەت جاريالانعان جوق. وقيعاعا بايلانىستى قاۋىپسىزدىك شارالارى كۇشەيتىلىپ، اۋە قورعانىسى جۇيەلەرى جوعارى دايىندىق رەجيمىنە كوشىرىلگەن.
