الماتى اۋەجايى قىزمەتكەرلەرىنە قاتىستى ەسىرتكى ءىسى بويىنشا تەرگەۋ باستالدى، دەپ حابارلايدى “ادىرنا” ۇلتتىق پورتالى قازتاگ-قا سىلتەمە جاساي وتىرىپ.
"ۇقك الماتى اۋەجايىنىڭ قىزمەتكەرلەرىنە قاتىستى قر قك 297-بابى 3-بولىگىنىڭ 1 جانە 3-تارماقتارى (ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارىن وتكىزۋ، جونەلتۋ نەمەسە وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ) بويىنشا سوتقا دەيىنگى تەرگەپ-تەكسەرۋ جۇرگىزىلۋدە", - دەدى ۇلتتىق قاۋىپسىزدىك كوميتەتى.
ايتا كەتەيىك، ۇقك وسى ىسكە قاتىستى الماتى حالىقارالىق اۋەجايى اكىمشىلىك دەپارتامەنتى باسشىسىنىڭ ورىنباسارى، تۇرىك توپ-مەنەدجەرى ۋفۋك سەرتتىڭ ۇستالعانى تۋرالى اقپاراتتى راستامادى.
ال 28 جەلتوقساندا الماتى اۋەجايىنىڭ ەكى تۇرىك توپ-مەنەدجەرى - كوممەرتسيا جونىندەگى اعا ۆيتسە-پرەزيدەنت يەتكين چەتين پاكەر جانە ءبىرىنشى ۆيتسە-پرەزيدەنت فاتيح ءومۋر قىزمەتتەرىن كۇتپەگەن جەردەن تاستاپ كەتكەنىن حابارلاعان بولاتىن. كەيىن الماتى اۋەجايى بۇل اقپاراتتى راستادى.
”ادىرنا” ۇلتتىق پورتالى
