Londondaǵy Hıtroý áýejaıy elektr stanııasyndaǵy órtke baılanysty bir kúndik úzilisten keıin qaıtadan reısterdi qabyldap, jónelte bastady, dep habarlaıdy "Adyrna" ulttyq portaly.
Bul týraly áýejaıdyń resmı paraqshasynda habarlandy.
"Hıtroý áýejaıy elektr qýatynyń keshe úzilgenine qaramastan, reısterdi qaıta qabyldaýda. Biz jaǵdaıdy retteý úshin úzdiksiz jumys istedik jáne endi ushýlardy qaýipsiz túrde jalǵastyramyz," – delingen habarlamada.
21 naýryzda áýejaı mańyndaǵy Heıs aýdanynda ornalasqan elektr stanııasynda órt shyǵyp, Hıtroý tolyqtaı toqtatylǵan bolatyn. Áýejaı ókilderiniń aıtýynsha, apat saldarynan aýqymdy aýmaqta elektr energııasy óshirilgen.
Tótenshe jaǵdaıdy Londonnyń terrorızmge qarsy kúres bólimi tergep jatyr. Degenmen, quqyq qorǵaý organdary qasaqana uıymdastyrylǵan árekettiń belgisi joq ekenin habarlady.
Aıta keteıik, Hıtroý – álemdegi eń iri áýejaılardyń biri. 2024 jyly onda rekordtyq 83,9 mıllıon jolaýshy saparlaǵan. Áýejaıda ár 45 sekýnd saıyn bir ushaq qonady nemese ushady.
