20 ناۋرىز كۇنى حيۋادا قازاقستان مەن وزبەكستان ءسىم كەڭەسىنىڭ العاشقى وتىرىسى ءوتتى، دەپ حابارلايدى «ادىرنا» ءتىلشىسى.
كۇن تارتىبىندە ەكىجاقتى ىنتىماقتاستىقتىڭ كەڭ اۋقىمدى ماسەلەلەرى قارالدى، سونىڭ ىشىندە ساياسي، ساۋدا-ەكونوميكالىق، ينۆەستيتسيالىق، كولىك جانە لوگيستيكالىق، سۋ-ەنەرگەتيكالىق جانە مادەني-گۋمانيتارلىق بايلانىستاردى دامىتۋ جايى تالقىلاندى. تاراپتار ستراتەگيالىق سەرىكتەستىك پەن وداقتاستىقتى نىعايتۋعا بەيىلدىلىگىن راستادى.
سىرتقى ىستەر ءمينيسترى مۇرات نۇرتىلەۋ مەملەكەت باسشىلارىنىڭ ساياسي ەرىك-جىگەرى مەن دانالىعىنىڭ ارقاسىندا قازاق-وزبەك قاتىناستارى جاڭا دەڭگەيگە كوتەرىلگەنىن اتاپ ءوتتى. سونداي-اق ول بيىك جانە جوعارى دەڭگەيدەگى ساياسي ديالوگتى ودان ءارى دامىتۋ مەن پارلامەنتارالىق بايلانىستاردى جانداندىرۋدىڭ ماڭىزدىلىعى ەكەنىن مالىمدەدى.
ءوز كەزەگىندە وزبەكستان سىرتقى ىستەر ءمينيسترى باحتيور سايدوۆ ەكى ەل باسشىسىنىڭ تىكەلەي باستاماسىمەن ىنتىماقتاستىقتىڭ بارلىق دەڭگەيدە قارقىندى كەڭەيىپ جاتقانىن راستادى.
تاراپتار ساۋدا-ەكونوميكالىق بايلانىستاردى نىعايتۋ، ءوزارا تاۋار اينالىمىن ارتتىرۋ جانە ونەركاسىپ، اۋىل شارۋاشىلىعى، كولىك، لوگيستيكا، قۇرىلىس سالالارىنداعى بىرلەسكەن ينۆەستيتسيالىق جوبالاردى ىسكە اسىرۋ بويىنشا كەلىسىلگەن شارالاردى قابىلداۋعا ۋاعدالاستى.
قازىرگى ۋاقىتتا قازاقستان وزبەكستاننىڭ ءۇش نەگىزگى ساۋدا سەرىكتەسىنىڭ قاتارىنا كىرەدى، ەكى ەل اراسىنداعى جىلدىق تاۋار اينالىمى 4 ملرد اقش دوللارىنان اسادى. مەملەكەت باسشىلارىنىڭ تاپسىرمالارىنا سايكەس 2030 جىلعا دەيىن بۇل كورسەتكىشتى 10 ملرد دوللارعا جەتكىزۋ جانە «ورتالىق ازيا» حالىقارالىق ونەركاسىپتىك كووپەراتسيا ورتالىعىن ىسكە قوسۋ جوسپارلانىپ وتىر.
