كەنەسارى حاننىڭ ءولىمى ءۇشىن قازاقتاردان كەشىرىم سۇراعان قىرعىز ءانشىسى قايرات پريمبەرديەۆ قاماۋدان شىقتى، دەپ حابارلايدى «ادىرنا» ءتىلشىسى.
ونەر يەسى بىشكەك قالاسىنىڭ پەرۆوماي اۋداندىق سوتىنىڭ شەشىمى بويىنشا قر قىلمىستىق كودەكسىنىڭ 330-بابى، 1-ءبولىمى بويىنشا كانىلى دەپ تانىلعان.
«قازاق ەلىنەن ءوز اتىمنان كەنەسارى باسى ءۇشىن كەشىرىم سۇرايمىن دەگەن سوزدەرىم قوعامدا قىزۋ تالقىعا ءتۇسىپ، كەيىن ۇلتتىق قاۋىپسىزدىك كوميتەتى شاقىرعان ەدى. ناتيجەسىندە 330-باپ، ەلدەر اراسىندا قاستىقتى قوزدىرۋ دەگەن ايىپ اياسىندا سوت ءوتتى. ۇكىم كۇشىنە ەندى. 100 مىڭ سوم (580 مىڭ تەڭگە — رەد.) قىرعىز مەملەكەتى بيۋدجەتىنە تولەيتىن بولدىم»، – دەدى ول الەۋمەتتىك جەلىدەگى پاراقشاسىندا.
اقپان ايىندا قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى قايرات پريمبەرديەۆتى قاماۋعا العان بولاتىن. سونداي-اق وعان ەلدەن شىعۋعا تىيىم سالىندى.
قىرعىزستان زاڭناماسىنا سايكەس، ۇلتارالىق، ءدىني نەمەسە ايماقارالىق ارازدىقتى قوزدىرۋعا باعىتتالعان ارەكەتتەر ءۇشىن 10 جىلعا دەيىن باس بوستاندىعىنان ايىرۋ جازاسى قاراستىرىلعان. دەگەنمەن، سوت انشىگە ايىپپۇل سالۋمەن شەكتەلدى.
