ماڭعىستاۋدا قۇنى 1,35 ملرد دوللاردى قۇرايتىن اممياك پەن كارباميد وندىرەتىن زاۋىت قۇرىلىسى باستالادى پرەمەر-مينيستر ولجاس بەكتەنوۆ ءتيىستى قاۋلىعا قول قويدى. بۇل تۋرالى بۇگىن، 21 ناۋرىزدا ۇكىمەتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
جوبانى QazaqGaz جانە ESTA بىرلەسكەن كاسىپورنى — «Qazesta Fertilizers LTD» كومپانياسىبازاسىندا ىسكە اسىرۋ جوسپارلانىپ وتىر. ۇكىمەتتىڭ مالىمەتىنشە، زاۋىتتىڭ ورنى رەتىندە ماڭعىستاۋ وبلىسى تاڭدالدى. بۇل ونىمدەردى كاسپي تەڭىزى ارقىلى ەكسپورتتاۋعا وڭتايلى جاعدايلاردى قامتاماسىز ەتەدى. Esta Construction تۇرىك كومپانياسى الەمدەگى ەڭ ۇزدىك 100 قۇرىلىس كومپانياسىنىڭ قاتارىنا كىرەدى.
«جوبانىڭ قۇنى – 1,35 ملرد دوللار. قۇرىلىستى ءۇش جارىم جىلدا اياقتاۋ جوسپارلانىپ وتىر. ىسكە اسىرۋ كەزەڭىندە 3 مىڭعا دەيىن ادام تارتىلىپ، قۇرىلىس اياقتالعاننان كەيىن 400 تۇراقتى جۇمىس ورنى اشىلادى. زاۋىتتىڭ وندىرىستىك قۋاتى جىلىنا 700 مىڭ تونناعا دەيىن كارباميدتى جانە 42 مىڭ توننا اممياكتى قۇرايدى»،—دەلىنگەن حابارلامادا.
جوبا گاز حيمياسى سالاسىن دامىتۋعا، سونداي-اق يمپورتتى الماستىرۋعا جانە قوسىلعان قۇنى جوعارى ونىمدەردى دايىنداۋعا باعىتتالعان.
ەسكە سالايىق، 4 ناۋرىزدا ۇكىمەت باسشىسى ولجاس بەكتەنوۆ ESTA Construction كومپانياسىنىڭ باس ديرەكتورى مۇستافا توپراكپەن كەزدەسىپ، ەلىمىزدە 675 ملرد تەڭگەنىڭ حيميا زاۋىتىن سالۋ ماسەلەسىن تالقىلاعان ەدى.
