قازاقستان رەسپۋبليكاسىنىڭ مادەنيەت جانە اقپارات مينيسترلىگى 2003 جىلعى يۋنەسكو كونۆەنتسياسى اياسىندا جەرگىلىكتى قاۋىمداستىقتاردىڭ ماتەريالدىق ەمەس مادەني مۇراسىن (مەمم) قورعاۋ بويىنشا اۋقىمدى جوبالاردى ىسكە اسىرۋدا.
بۇل – قازاقستاننىڭ ۇلتتىق بىرەگەيلىگىنىڭ ماڭىزدى بولىگى سانالاتىن مادەني داستۇرلەر مەن تاجىريبەلەردى ودان ءارى ساقتاۋ ءۇشىن ستراتەگيالىق تۇرعىدا قاجەت جوبا.
وسى باستاما اياسىندا مينيسترلىك يۋنەسكو-نىڭ تەحنيكالىق گرانتىن ىسكە اسىرۋ ءۇشىن اتىراۋ، شىعىس قازاقستان، قاراعاندى، قىزىلوردا جانە جەتىسۋ وبلىستارىنىڭ اكىمدىكتەرىمەن ىنتىماقتاستىق تۋرالى مەموراندۋمدارعا قول قويدى. بۇل ارىپتەستىك ايماقتىق دەڭگەيدە ماتەريالدىق ەمەس مادەني مۇرانى جۇيەلى تۇردە ساقتاۋ مەن دامىتۋ ءۇشىن ماڭىزدى.
جوبانىڭ نەگىزگى مىندەتتەرى – ماتەريالدىق ەمەس مادەني مۇرا ەلەمەنتتەرىن قورعاۋ، دامىتۋ جانە جان-جاقتى ناسيحاتتاۋعا ارنالعان ءتيىمدى وڭىرلىك مەحانيزمدەر قۇرۋ. سونداي-اق وبلىستىق جانە اۋداندىق دەڭگەيدەگى ماماندار، جوعارى وقۋ ورىندارىنىڭ وقىتۋشىلارى مەن جەرگىلىكتى قاۋىمداستىق وكىلدەرى ءۇشىن وقىتۋ سەمينارلارى مەن ترەنينگتەر وتكىزۋ جوسپارلانعان. وقۋ بارىسىندا مەمم ەلەمەنتتەرىن تۇگەندەۋ مەن قۇجاتتاۋدىڭ ادىستەرىن مەڭگەرۋ، سونداي-اق داستۇرلەر مەن مادەنيەتتى ۇستاناتىن ازاماتتارمەن بايلانىس ورناتۋ ماسەلەلەرىنە نازار اۋدارىلادى.
بۇدان بولەك، ماتەريالدىق ەمەس مادەني مۇرا جونىندەگى اقپاراتتىق-انىقتامالىق ماتەريالداردى دايىنداۋدا كونسۋلتاتيۆتىك قولداۋ كورسەتۋ، جەرگىلىكتى مەمم ەلەمەنتتەرىن ۇلتتىق تىزىمگە ەنگىزۋ بويىنشا كومەك كورسەتۋ جانە بارلىق تالاپتار ورىندالعان جاعدايدا ولاردى يۋنەسكو تىزىمىنە قوسۋ شارالارى قاراستىرىلعان. بۇل قازاقستاننىڭ مادەني داستۇرلەرىن حالىقارالىق دەڭگەيدە قورعاۋ ءارى مويىنداۋ مۇمكىندىكتەرىن ارتتىرادى.
جالپى، جوبانى جۇزەگە اسىرۋ بۇل سالاداعى مامانداردىڭ بىلىكتىلىگىن ارتتىرىپ قانا قويماي، ماتەريالدىق ەمەس مادەني مۇرانى بولاشاق ۇرپاققا ساقتاپ، جەتكىزۋدىڭ ءتيىمدى جۇيەسىن قۇرۋعا جاعداي جاسايدى.
وسى باعىتتاعى جۇمىستار تەك قازاقستان مادەنيەتىندەگى ەلەمەنتتەردى ساقتاۋعا عانا ەمەس، سونىمەن قاتار الەۋمەتتىك بىرلىكتى نىعايتۋعا، مادەنيەتپەن تولىق تانىسۋعا جانە جەرگىلىكتى قاۋىمداستىقتاردىڭ تۇراقتى دامۋىنا ىقپال ەتەدى.
