رەسەيلىك Sirena Travel كومپانياسى قازاقستان ازاماتتارىنىڭ جەكە دەرەكتەرىنىڭ اشىق قولجەتىمدى بولۋىنا كىنالى دەپ تانىلىپ، جازالانعانى بەلگىلى بولدى، دەپ حابارلايدى “ادىرنا” ۇلتتىق پورتالى.
بۇل تۋرالى قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە قاراستى اقپاراتتىق قاۋىپسىزدىك كوميتەتىنىڭ توراعاسى رۋسلان ابدىقالىقوۆ مالىمدەدى.
ء“بىز وتكەن اپتادا رەسەيدىڭ روسكومنادزورىنان رەسمي جاۋاپ الدىق. ولار كومپانيانىڭ رەسەيلىك زاڭناماعا سايكەس جازالانعانىن حابارلادى”، – دەدى ابدىقالىقوۆ ورتالىق كوممۋنيكاتسيالار قىزمەتىندەگى بريفينگتە.
الايدا Sirena Travel قانداي جازاعا تارتىلعانى بەلگىسىز. سونىمەن قاتار، ابديكاليكوۆ دەرەكتەردىڭ تارالۋىنان زارداپ شەككەن قازاقستاندىقتار تەك سوتقا جۇگىنۋ ارقىلى عانا وتەماقى تالاپ ەتە الاتىنىن ايتتى.
“وكىنىشكە قاراي، قازىر قازاقستان مەن رەسەي زاڭناماسىندا مۇنداي وتەماقى تولەۋ پروتسەدۋراسى قاراستىرىلماعان. ءبىز بۇل باعىتتا جۇمىس ىستەپ جاتىرمىز. بولاشاقتا كيبەرساقتاندىرۋ جۇيەسى ەنگىزىلسە، ازاماتتار وتەماقىنى وڭاي الا الادى. ال قازىر جالعىز جول – رەسەي فەدەراتسياسىنىڭ سوتىنا شاعىم ءتۇسىرىپ، شىعىندى دالەلدەۋ”، – دەپ ءتۇسىندىردى ول.
ەسكە سالا كەتەيىك، 2023 جىلدىڭ سوڭىندا قازاقستان ازاماتتارىنىڭ اتى-ءجونى، تولقۇجات ءنومىرى جانە باسقا دا دەرەكتەرى ينتەرنەتتە ەركىن قولجەتىمدى بولعانى انىقتالدى. ول كەزدە رۋسلان ابدىقالىقوۆ اقپاراتتىڭ رەسەي اۋماعىندا ورنالاسقان Sirena Travel كومپانياسىنىڭ كىناسىنەن تاراعانىن مالىمدەگەن ەدى.
