بۇگىن كورنەكتى مەملەكەت جانە قوعام قايراتكەرى جۇمابەك تاشەنوۆتىڭ تۋعانىنا 110 جىل تولدى. ول ەل بىرلىگى مەن تۇتاستىعى جولىندا ايانباي ەڭبەك ەتكەن تۇلعالاردىڭ ءبىرى بولدى.
جۇمابەك احمەتۇلى قازاق جەرىنىڭ بىرتۇتاستىعىن ساقتاپ قالۋ جولىندا ۇلكەن كۇرەس جۇرگىزدى. ول ماڭعىستاۋدى تۇرىكمەنستانعا، سولتۇستىك قازاقستاننىڭ ءبىر بولىگىن رەسەيگە، ال ماقتا ەگەتىن وڭتۇستىك اۋدانداردى وزبەكستانعا بەرۋ تۋرالى ۇسىنىستارعا قارسى شىقتى. سونداي-اق قازاقستاندا يادرولىق سىناقتاردىڭ جاسالۋىنا قارسىلىق ءبىلدىرىپ، ۇلتتىق مادەنيەتتى قورعاۋعا اتسالىستى.
قايراتكەر شىعارماشىلىق وداقتارعا قامقورلىق تانىتىپ، كوپتەگەن ونەر ادامدارىنا قولداۋ كورسەتتى. ونىڭ ارالاسۋىمەن "قازاق ادەبيەتى" گازەتى جابىلۋدان امان قالىپ، "سوتسياليستىك قازاقستان" (قازىرگى "Egemen Qazaqstan") باسىلىمىنىڭ اۋدارما گازەتكە اينالۋىنا جول بەرىلمەدى.
ۇلتجاندىلىعى ءۇشىن كەڭەستىك بيلىك تاراپىنان "ۇلتشىل" دەگەن ايىپ تاعىلىپ، قىزمەتىنەن بوساتىلدى. 1961 جىلدان باستاپ شىمكەنت وبلىسىندا ءتۇرلى لاۋازىمداردا قىزمەت ەتىپ، 1975 جىلى زەينەتكە شىقتى.
جۇمابەك تاشەنوۆ 1986 جىلى ومىردەن ءوتتى. بۇگىندە ونىڭ ەسىمى كوشەلەرگە بەرىلىپ، دەرەكتى فيلمدەر ءتۇسىرىلىپ، قازاق حالقى ونىڭ ەڭبەگىن قۇرمەتپەن ەسكە الادى.
