Búgin kórnekti memleket jáne qoǵam qaıratkeri Jumabek Táshenovtiń týǵanyna 110 jyl toldy. Ol el birligi men tutastyǵy jolynda aıanbaı eńbek etken tulǵalardyń biri boldy.
Jumabek Ahmetuly qazaq jeriniń birtutastyǵyn saqtap qalý jolynda úlken kúres júrgizdi. Ol Mańǵystaýdy Túrikmenstanǵa, Soltústik Qazaqstannyń bir bóligin Reseıge, al maqta egetin ońtústik aýdandardy Ózbekstanǵa berý týraly usynystarǵa qarsy shyqty. Sondaı-aq Qazaqstanda ıadrolyq synaqtardyń jasalýyna qarsylyq bildirip, ulttyq mádenıetti qorǵaýǵa atsalysty.
Qaıratker shyǵarmashylyq odaqtarǵa qamqorlyq tanytyp, kóptegen óner adamdaryna qoldaý kórsetti. Onyń aralasýymen "Qazaq ádebıeti" gazeti jabylýdan aman qalyp, "Soıalıstik Qazaqstan" (qazirgi "Egemen Qazaqstan") basylymynyń aýdarma gazetke aınalýyna jol berilmedi.
Ultjandylyǵy úshin keńestik bılik tarapynan "ultshyl" degen aıyp taǵylyp, qyzmetinen bosatyldy. 1961 jyldan bastap Shymkent oblysynda túrli laýazymdarda qyzmet etip, 1975 jyly zeınetke shyqty.
Jumabek Táshenov 1986 jyly ómirden ótti. Búginde onyń esimi kóshelerge berilip, derekti fılmder túsirilip, qazaq halqy onyń eńbegin qurmetpen eske alady.
