AUYL SPORT جوباسى ءوز اۋقىمىن كەڭەيتىپ، جاڭا مۇمكىندىكتەر ۇسىنۋدا. ەندى باعدارلاما اياسىندا اۋىلدىق جەرلەردە تاعى ءبىر قىزىقتى سپورت ءتۇرى – ۇستەل تەننيسى قولجەتىمدى بولماق. بۇل باستاما تيمۋر جانە دينارا قۇلىباەۆتار نەگىزىن قالاعان Halyk قايىرىمدىلىق قورى مەن قازاقستان رەسپۋبليكاسىنىڭ ۇستەل تەننيسى فەدەراتسياسى اراسىنداعى ىنتىماقتاستىق ناتيجەسىندە جۇزەگە اسۋدا.
بۇل كەلىسىمنىڭ باستى ماقساتى – اۋىلدىق ايماقتاردا ۇستەل تەننيسىن دامىتۋ، بالالاردى سپورتقا تارتۋ جانە جاتتىقتىرۋشىلار مەن تورەشىلەردىڭ بىلىكتىلىگىن ارتتىرۋ.
AUYL SPORT جوباسى اياسىندا اۋىل بالالارى جاڭا مۇمكىندىكتەرگە يە بولىپ، ءوز تالانتتارىن دامىتپاق.
جوبا اياسىندا تاراپتار ادىستەمەلىك قولداۋ كورسەتۋ، جارىستار مەن باسقا دا سپورتتىق ءىس-شارالاردى ۇيىمداستىرۋ جونىندە كەلىسىمگە كەلدى. سونداي-اق، بۇل ىنتىماقتاستىق قايىرىمدىلىق مادەنيەتىن دامىتۋ مەن بۇقارالىق سپورتتى ناسيحاتتاۋعا باعىتتالعان.
“اۋىلدىق جەرلەردە سپورتتى دامىتۋ – ءبىزدىڭ قوردىڭ باستى مىندەتتەرىنىڭ ءبىرى. ءبىز وڭىرلەردە بۇقارالىق سپورتتى دامىتۋعا ارنالعان اۋقىمدى جوبالاردى جۇزەگە اسىرىپ كەلەمىز. AUYL SPORT جوباسىنا ۇستەل تەننيسىنىڭ قوسىلۋى – بالالار مەن جاسوسپىرىمدەر ءۇشىن جاڭا مۇمكىندىكتەردىڭ باستاۋى”، – دەيدى Halyk قورىنىڭ اتقارۋشى ديرەكتورى عالىمبەك جاقسىلىقوۆ.
ۇستەل تەننيسى – الەمدەگى ەڭ قولجەتىمدى سپورت تۇرلەرىنىڭ ءبىرى. ول قىمبات جابدىقتاردى قاجەت ەتپەيدى جانە ءتىپتى شاعىن اۋىل مەكتەپتەرىندە دە ۇيىمداستىرىلۋى مۇمكىن. قازاقستاندا بۇل سپورت قارقىندى دامىپ كەلەدى، ال AUYL SPORT جوباسىنىڭ ارقاسىندا اۋىلدىق جەرلەردەگى بالالارعا كاسىبي دەڭگەيگە جەتۋگە مۇمكىندىك اشىلماق.
AUYL SPORT – بولاشاق چەمپيوندارعا ارنالعان پلاتفورما
2024 جىلى ىسكە قوسىلعان AUYL SPORT جوباسى اۋىل بالالارىنا ارنالعان ەڭ ءىرى سپورتتىق باستاماعا اينالدى. بىلتىر وڭىرلىك تۋرنيرلەرگە 200 ەلدى مەكەننەن 12 000 جاس سپورتشى قاتىسىپ، ال فينالعا 17 وڭىردەن 1 300 ۇزدىك قاتىسۋشى ونەر كورسەتتى. جوبادا قازىردىڭ وزىندە بوكس، كۇرەس، كاراتە، باسكەتبول، ۆولەيبول جانە شاحمات ەنگىزىلگەن، ال 2025 جىلدان باستاپ ۇستەل تەننيسى قوسىلادى.
2016 جىلدان بەرى Halyk قورى بىلىم بەرۋ، دەنساۋلىق ساقتاۋ جانە سپورتتى دامىتۋعا باعىتتالعان 120-دان استام الەۋمەتتىك جوبانى جۇزەگە اسىردى. AUYL SPORT – بالالارعا سپورتقا قولجەتىمدىلىك بەرەتىن، ولاردىڭ مىنەزىن قالىپتاستىرىپ، جاڭا مۇمكىندىكتەر اشاتىن جۇيەلى باستامالاردىڭ ءبىرى.
بۇل جوبا اربىر بالانىڭ تۇرعىلىقتى جەرىنە قاراماستان، سپورتپەن اينالىسۋىنا مۇمكىندىك بەرۋ ارقىلى ولاردىڭ تاعدىرىن وزگەرتەدى.
“AUYL SPORT – بۇل Halyk قورىنىڭ قازاقستاننىڭ بولاشاعىنا سالعان ينۆەستيتسياسى. ءاربىر بالانىڭ ءوز الەۋەتىن اشۋعا مۇمكىندىگى بولۋى كەرەك”، – دەيدى عالىمبەك جاقسىلىقوۆ.
