تالعاردا قازا تاپقان شەرزات پولاتتىڭ وتباسى قۇقىق قورعاۋشى ايتبەك امانگەلدىمەن ىنتىماقتاستىقتى توقتاتتى، دەپ حابارلايدى "ادىرنا" ۇلتتىق پورتالى.
الايدا، ولار زاڭگەرلىك قولداۋدان باس تارتپاعانىن مالىمدەدى. ەندى ولاردىڭ مۇددەسىن ادۆوكاتتار مەيىرمان شەكەەۆ پەن جاندوس پالمانوۆ قورعايتىن بولادى.
بۇعان دەيىن شەرزاتتىڭ اكەسى قارجاۋباي نۇرىموۆ بارلىق ادۆوكاتتاردان باس تارتتى دەگەن اقپارات تاراعان ەدى. الايدا قوعام بەلسەندىسى جان احماديەۆ بۇل تۇسىنىسپەۋشىلىك ەكەنىن ايتتى. ونىڭ سوزىنشە، وتباسى تەك بۇرىنعى وكىلى ايتبەك امانگەلدىمەن بايلانىستى ءۇزۋدى قالاعان.
"قارجاۋبايدىڭ وتباسى ادۆوكاتتاردان باس تارتقان جوق. ولار تەك ايتبەك امانگەلدىمەن قارىم-قاتىناستى توقتاتتى", – دەدى احماديەۆ.
وتباسىنىڭ جاڭا ادۆوكاتى مەيىرمان شەكەەۆتىڭ ايتۋىنشا، ونىڭ كومانداسى بۇعان دەيىن ءىستى جۇرگىزگەن زاڭگەرلەرمەن جۇمىس ىستەۋگە دايىن. الايدا، ول سوڭعى ەكى كۇن بويى ءىستىڭ ماتەريالدارىن الا الماي جۇرگەنىن جەتكىزدى.
ەسكە سالا كەتەيىك، 2024 جىلدىڭ قازان ايىندا تالعار قالاسىندا ءجاسوسپىرىم شەرزات پولات كىسى قولىنان قازا تاپتى. بۇل وقيعا قوعامدا ۇلكەن رەزونانس تۋدىرىپ، جابىرلەنۋشىنىڭ تۋىستارى مەن تۇرعىندار ءادىل تەرگەۋ جۇرگىزۋدى تالاپ ەتىپ، نارازىلىق ۇيىمداستىردى.
جەلتوقسان ايىندا پوليتسيا تالعار شەتىنەن شەرزاتتىڭ 30 جاستاعى اعاسى نۇرعانات عايىپباەۆتىڭ دەنەسىن تاپتى. تەرگەۋ نۇسقاسى بويىنشا، ول قىسىمعا شىداماي، ءوز-وزىنە قول جۇمساعان.
