19 ناۋرىز كۇنى اقش-تىڭ ۇلتتىق مۇراعاتى تەحاستا ولتىرىلگەن اقش-تىڭ 35-پرەزيدەنتى دجون كەننەدي، ونىڭ ساياساتكەر باۋىرى روبەرت كەننەدي جانە قارا ناسىلدىلەردىڭ قۇقىقتارى ءۇشىن كۇرەسكەن بەلسەندى مارتين ليۋتەر كينگتىڭ ولىمىنە قاتىستى قۇپيالانعان قۇجاتتاردى جاريالادى، دەپ حابارلايدى "ادىرنا" ۇلتتىق پورتالى.
"2025 جىلعى 17 ناۋرىزدا پرەزيدەنت دونالد ترامپتىڭ نۇسقاۋىنا سايكەس، پرەزيدەنت دجون ف. كەننەديدىڭ ولىمىنە قاتىستى قۇجاتتار جيناعىنىڭ بۇرىن قۇپيا بولعان بارلىق دەرەكتەرى جاريالانادى", – دەلىنگەن مۇراعات سايتىندا.
اقش بيلىگى زاڭ بويىنشا كەننەديدىڭ ولىمىنە قاتىستى بارلىق مالىمەتتى 2017 جىلعا دەيىن تولىق اشۋى كەرەك بولعان. الايدا سول كەزدەگى پرەزيدەنت دونالد ترامپ پەن ودان كەيىن بيلىككە كەلگەن دجو بايدەن ارنايى قىزمەتتەرگە اقپاراتتىڭ جاريالانۋى اقش-تىڭ مۇددەلەرى مەن حالىقارالىق قاتىناستارىنا قانشالىقتى زيان كەلتىرەتىنىن باعالاۋعا قوسىمشا ۋاقىت بەرگەن.
ول كەزدە جاريالانعان بىرنەشە قۇجات سەنساتسياعا اينالعان جوق. پرەزيدەنتتىك ەكىنشى مەرزىمىن باستاعاننان كەيىن ترامپ جاڭا قۇجاتتاردى جاريالاۋ تۋرالى جارلىق شىعارىپ، 18 ناۋرىزدا ولاردى اشىققا شىعاراتىنىن مالىمدەدى. اقش پرەزيدەنتىنىڭ ايتۋىنشا، شامامەن 80 مىڭ بەت قۇجات ەشقانداي رەداكتسياسىز جاريالانعان.
"تسيفرلىق قۇجاتتار، سونىڭ ىشىندە بۇرىن قۇپيا بولعان قىزمەتتىك جازبالاردىڭ PDF فايلدارى، 1962 جىلعى كۋبا داعدارىسىنان كەيىن اقش پەن كەڭەس وداعى اراسىنداعى قارىم-قاتىناستاردا ورىن العان ۇرەيلى اتموسفەرانى سەزىنۋگە مۇمكىندىك بەرەدى، – دەپ جازادى Reuters اگەنتتىگى.
جۋرناليستەردىڭ باعالاۋىنشا، جاريالانعان قۇجاتتاردان باستاپقى رەسمي نۇسقادان ايىرماشىلىعى بايقالماعان
كەننەدي 1963 جىلعى 22 قاراشادا داللاس قالاسىندا وققا ۇشتى. ول پرەزيدەنت قىزمەتىن نەبارى ءۇش جىلعا جەتپەيتىن ۋاقىت اتقاردى. تەرگەۋ ونىڭ ولىمىنە لي حارۆي وسۆالدتىڭ جالعىز ءوزى جاۋاپتى ەكەنىن انىقتادى. وسۆالد تۇتقىندالعاننان ەكى كۇن وتكەن سوڭ ولتىرىلگەن.
