بۇگىن، 23 قاڭتار كۇنى. ابۋ-دابيدە رەسەي، اقش جانە ۋكراينا اراسىنداعى ۇشجاقتى جۇمىس توبىنىڭ العاشقى وتىرىسى وتەدى. بۇل تۋرالى رەسەي پرەزيدەنتىنىڭ كومەكشىسى يۋري ۋشاكوۆ تەلەفون ارقىلى وتكەن بريفينگتە ايتتى، دەپ حابارلايدى "ادىرنا".
بريفينگ ۋكرايناداعى بەيبىت رەتتەۋ ماسەلەسى بويىنشا دونالد ترامپ وكىلدەرى مەن رف پرەزيدەنتى ۆلاديمير پۋتين اراسىنداعى كەلىسسوزدەردىڭ قورىتىندىسىنا ارنالدى.
يۋري ۋشاكوۆتىڭ ايتۋىنشا، «جۇما كۇنى، ياعني 23 قاڭتاردا ابۋ-دابيدە قاۋىپسىزدىك ماسەلەلەرى بويىنشا ۇشجاقتى جۇمىس توبىنىڭ العاشقى وتىرىسىن وتكىزۋ تۋرالى ۋاعدالاستىققا قول جەتكىزىلەدى». ونىڭ مالىمدەمەسىنىڭ جازباسى تاسس مەملەكەتتىك اقپارات اگەنتتىگىنىڭ سايتىندا جاريالاندى.
رەسەي دەلەگاتسياسى قازىردىڭ وزىندە جاساقتالعان جانە الداعى ساعاتتاردا بىرىككەن اراب امىرلىكتەرىنە اتتانادى. دەلەگاتسيا قۇرامىنا رف قورعانىس مينيسترلىگى باسشىلىعىنىڭ وكىلدەرى كىرەدى. ولاردى رف قارۋلى كۇشتەرى باس شتابى باس باسقارماسىنىڭ (بۇرىنعى گرۋ) باسشىسى، ادميرال يگور كوستيۋكوۆ باستاپ بارادى.
23 قاڭتارعا قاراعان ءتۇنى كرەملدە جابىق فورماتتا وتكەن كەزدەسۋگە امەريكالىق تاراپتان اقش پرەزيدەنتىنىڭ ارنايى وكىلى ستيۆ ۋيتكوفف، اق ءۇيدىڭ اعا كەڭەسشىسى دجوش گريۋنباۋم جانە دونالد ترامپتىڭ كۇيەۋ بالاسى دجارەد كۋشنەر قاتىستى.
2017–2021 جىلدارى ترامپتىڭ اعا كەڭەسشىسى قىزمەتىن اتقارعان دجارەد كۋشنەر قازىرگى ۋاقىتتا اقش اكىمشىلىگىندە رەسمي لاۋازىمعا يە ەمەس. سوعان قاراماستان، ول ترامپقا ىقپالىن ساقتاپ، اق ءۇيدىڭ ديپلوماتيالىق جانە ساياسي باستامالارىنا قاتىسىپ ءجۇر.
ال دجوش گريۋنباۋم – اقش-تىڭ جالپى قىزمەتتەر باسقارماسىنداعى فەدەرالدىق ساتىپ الۋلار قىزمەتىنىڭ كوميسسارى. ول ترامپ تاعايىنداعان جاڭادان قۇرىلعان «بەيبىتشىلىك كەڭەسىنىڭ» اعا كەڭەسشىسى رەتىندە بۇل كەلىسسوزدەرگە العاش رەت قاتىسقان.
كرەملدەگى كەزدەسۋگە رەسەي تاراپىنان ۆلاديمير پۋتين مەن يۋري ۋشاكوۆتان بولەك، رف پرەزيدەنتىنىڭ ارنايى وكىلى، رەسەي تىكەلەي ينۆەستيتسيالار قورىنىڭ (رفپي) باس ديرەكتورى كيريلل دميتريەۆ قاتىستى. يۋري ۋشاكوۆتىڭ ايتۋىنشا، كەلىسسوزدەر ءتورت ساعاتتان استام ۋاقىتقا سوزىلىپ، «اسا مازمۇندى، كونسترۋكتيۆتى، بارىنشا اشىق ءارى سەنىمدى جاعدايدا» وتكەن.
ۋشاكوۆتىڭ سوزىنشە، ستيۆ ۋيتكوفف پەن دجارەد كۋشنەر داۆوستا وتكەن كەزدەسۋلەردەن العان اسەرلەرىمەن، سونىڭ ىشىندە دونالد ترامپ پەن ۆلاديمير زەلەنسكي اراسىنداعى جۇزدەسۋ تۋرالى ويلارىمەن بولىسكەن.
سونىمەن قاتار ول ابۋ-دابيدە رەسەي مەن اقش اراسىنداعى ەكىجاقتى ەكونوميكالىق ماسەلەلەر جونىندەگى توپ باسشىلارى — ستيۆ ۋيتكوفف پەن كيريلل دميتريەۆتىڭ دە كەزدەسۋى وتەتىنىن اتاپ ءوتتى.
