Qazaqstannyń Syrtqy ister mınıstrligi USAID qarjylandyrǵan jobalardyń «málimdelgen maqsattarǵa sáıkestigin» tekserý úshin jumys tobyn qurdy. Bul týraly vıe-premer Serik Jumanǵarın depýtattardyń saýalyna jaýap berý barysynda málimdedi, dep habarlaıdy "Adyrna" ulttyq portaly.
AMANAT partııasynyń músheleri vıe-premerge osy másele boıynsha saýal joldaǵan. Jaýap retinde Jumanǵarın uıymnyń qyzmetin «jan-jaqty taldaý» júrgiziletinin aıtty.
«Atap aıtqanda, USAID-tyń eldik strategııalary zertteledi, sondaı-aq USAID-tyń basqa uıymdarmen, onyń ishinde úkimettik jáne úkimettik emes qurylymdarmen baılanysy qarastyrylady. Bul baılanystardyń agenttik maqsattaryna yqtımal áserin baǵalaý mańyzdy. Sonymen qatar qarjylyq aǵyndardy taldaý qajet, osylaısha qarajatty paıdalaný kezindegi sáıkessizdikter, múddeler qaıshylyǵy jáne yqtımal jasyryn shemalar anyqtalady», – dedi vıe-premer.
Depýtattardyń «kámeletke tolmaǵandardy bóten ıdeologııadan qorǵaý týraly zań jobasyn ázirleý» usynysyna qatysty Jumanǵarın ádilet mınıstrligi bul máseleni memlekettik organdarmen talqylaýǵa jibergenin málimdedi.
Vıe-mınıstrdiń aıtýynsha, 2024 jyly USAID-pen ekijaqty kelisimder aıasynda 28 uzaqmerzimdi baǵdarlama júzege asyrylǵan. Jalpy, 2023–2024 jyldary AQSh-tyń halyqaralyq damý jónindegi agenttigi Qazaqstandaǵy baǵdarlamalarǵa 26,5 mln dollar bólgen. Bul qarajat ekonomıka, energetıka, densaýlyq saqtaý, azamattyq qoǵam, medıa jáne basqa da salalarǵa baǵyttalǵan.
USAID Qazaqstandaǵy kedendik ınfraqurylymdy jańǵyrtý jobalaryna qatysqan. Ortalyq Azııadaǵy saýda baǵdarlamasy aıasynda Memlekettik kirister komıtetine jalpy quny 385,8 mln teńge (774 myń dollar) bolatyn 12 serverlik jabdyq birligi berilgen. Sondaı-aq «Úzilissiz tranzıt» jáne óńir elderi arasynda aldyn ala aqparat almasý jobalary júzege asyrylǵan.
Aıta keteıik, 20 qańtarda Aq úıge qaıta oralǵan Donald Tramp basqa memleketterge bólinetin AQSh kómegin 90 kúnge toqtatty. Bul jarlyq eń aldymen USAID qyzmetine áser etti. AQSh prezıdentiniń ákimshiligi agenttikti «ysyrapshyldyq pen zańbuzýshylyqqa jol berdi» dep aıyptaǵan.
