استانادا جۇك كولىگى قاعىپ كەتكەن قىز بالا وقيعا ورنىندا قازا تاپتى. پوليتسيا جول-كولىك وقيعاسى بويىنشا قىلمىستىق ءىس قوزعادى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
قالالىق پوليتسيا دەپارتامەنتىنىڭ مالىمەتىنشە، قايعىلى وقيعا بەيسەكباەۆ پەن كەنەسارى كوشەلەرىنىڭ قيىلىسىندا بولعان. جۇرگىزۋشى جولدىڭ رۇقسات ەتىلگەن بولىگىنەن ءوتىپ بارا جاتقان بالانى قاعىپ كەتكەن.
"جۇك كولىگىنىڭ جۇرگىزۋشىسى بەيسەكباەۆ كوشەسىمەن كەلە جاتىپ، كەنەسارى كوشەسىنە بۇرىلۋ كەزىندە جاياۋ جۇرگىنشىنى قاعىپ كەتتى. قىز بالا رۇقسات ەتىلگەن جەردە، جاسىل جارىق جانعاندا جولدى كەسىپ وتكەن. الايدا العان اۋىر جاراقاتتارىنىڭ سالدارىنان وقيعا ورنىندا كوز جۇمدى. قازىر تەرگەۋ امالدارى ءجۇرىپ جاتىر، جۇرگىزۋشىنىڭ بۇلتارتپاۋ شاراسى قارالۋدا", – دەپ مالىمدەدى استانا پوليتسياسى.
قۇقىق قورعاۋ ورگاندارى جول قوزعالىسى ەرەجەلەرىن قاتاڭ ساقتاۋعا شاقىردى.
"جۇرگىزۋشىلەر جىلدامدىق رەجيمىن ساقتاپ، جاياۋ جۇرگىنشىلەر وتكەلدەرىندە بارىنشا مۇقيات بولۋى ءتيىس. ال اتا-انالار بالالارعا جول قاۋىپسىزدىگى ەرەجەلەرىن ءتۇسىندىرىپ، ولاردى قاراۋسىز قالدىرماۋى قاجەت", – دەپ ەسكەرتتى پوليتسيا دەپارتامەنتى.
