قازاقستاندا كرەاتيۆتى يندۋستريانى دامىتۋ قورى قۇرىلاتىن بولادى. ول ەلدەگى جەتەكشى شىعارماشىلىق جانە ءبىلىم بەرۋ ۇيىمدارىنىڭ قاتىسۋىمەن قورپوراتيۆتىك قور رەتىندە قۇرىلادى. بۇل جايىندا مادەنيەت جانە اقپارات ءمينيسترى ايدا بالاەۆا ۇكىمەت وتىرىسىندا ءمالىم ەتتى، دەپ حابارلايدى “ادىرنا” ۇلتتىق پورتالى.
قور قىزمەتىن 4 نەگىزگى باعىت بويىنشا جۇزەگە اسىرادى. يدەيادان باستاپ دايىن ءونىم مەن قىزمەتكە دەيىنگى بارلىق كەزەڭدەردى قامتيتىن بولادى:
- تالانتتاردى انىقتاۋ (كونكۋرستار، كرەاتوندار، ءموبيلدى پروديۋسەرلىك ورتالىقتار ۇيىمداستىرۋ، وڭىرلەردە تالانتتاردى ىزدەۋ).
- جوبالاردى دامىتۋ (ستارتاپتاردى اكسەلەراتسيالاۋ جانە ينكۋباتسيالاۋ، كوممەرتسيالاندىرۋ، ينۆەستيتسيا تارتۋ).
- ينفراقۇرىلىمدى دامىتۋ (حابتار جەلىسىن كەڭەيتۋ، تۇراقتى ارت-الاڭدار قۇرۋ، مەملەكەتتىك مۇلىككە قول جەتكىزۋدى قامتاماسىز ەتۋ).
- ەكسپورتقا قولداۋ كورسەتۋ (شەتەلدىك اۋديتورياعا شىعۋ، ماركەتينگ جانە PR, اۆتورلىق قۇقىقتى قورعاۋ).
مينيستر مۇنداي قۇرىلىمدار الەمنىڭ جەتەكشى ەلدەرىندە دە بارىن ايتادى. ۇلىبريتانيادا – Creative England (كرەاتيۆ ينگلاند) قورى، وڭتۇستىك كورەيادا – Creative Korea (كرەاتيۆ كورەيا) قورى جۇمىس ىستەيدى. بۇل قور كورەي مادەني تولقىنىن دامىتۋدىڭ نەگىزگى وپەراتورى سانالادى.
قازاقستانداعى كرەاتيۆتى يندۋستريالاردى دامىتۋ قورىنىڭ بيۋدجەتى ۇلتتىق لوتەرەيا وپەراتورى قىزمەتىنەن بولىنەتىن 3% اۋدارىم ەسەبىنەن قالىپتاستىرىلادى.
«وسىعان بايلانىستى «استانا» حالىقارالىق قارجى ورتالىعى (احقو) بازاسىندا ۆەنچۋرلىق بولىمشە قۇرىلىپ، ينۆەستيتسيالاردى ءتيىمدى باسقارۋ ءۇشىن باسقارۋشى كومپانيالار پۋلى تارتىلادى،- دەپ مالىمدەدى بالاەۆا.
