يزرايل 19 قاڭتاردا كۇشىنە ەنگەن اتىستى توقتاتۋ تۋرالى كەلىسىمنىڭ كۇشىن بىرجاقتى تۇردە جويىپ، "ساياسي جاعدايعا سايكەس" گازا سەكتورىنداعى حاماس نىساندارىنا جاپپاي سوققى بەرۋدى قايتا باستادى، دەپ حابارلايدى “ادىرنا” ۇلتتىق پورتالى BBC سايتىنا سىلتەپ.
مالىمەت بويىنشا، يزرايل اسكەرى سەيسەنبىگە قاراعان ءتۇنى ەل باسشىلىعىنىڭ بۇيرىعىنان كەيىن گازا سەكتورىنداعى حاماس نىساندارىنا اۋە سوققىلارىن قايتا باستادى. گازا بيلىگى مەن جەرگىلىكتى مەديتسينا قىزمەتكەرلەرى اتقىلاۋ سالدارىنان ونداعان ادامنىڭ قازا تاپقانىن حابارلادى.
“بۇل حاماس-تىڭ ءبىزدىڭ تۇتقىندارىمىزدى بوساتۋدان بىرنەشە رەت باس تارتۋىنان، سونداي-اق اقش پرەزيدەنتىنىڭ ارنايى وكىلى ستيۆ ۋيتكوفف پەن دەلدالدار ۇسىنعان بارلىق ۇسىنىستاردى قابىلداماۋىنان كەيىن بولدى. قازىر تساحال گازا سەكتورىنداعى حاماس تەرروريستىك ۇيىمىنىڭ نىساندارىنا سوققى بەرىپ جاتىر. بۇل اسكەري وپەراتسيانىڭ نەگىزگى ماقساتتارىنا جەتۋ ءۇشىن جاسالۋدا، ونىڭ ىشىندە تۇتقىندارىمىزدى – ءتىرى نەمەسە قازا تاپقاندارىن تولىقتاي بوساتۋ تالاپتارى بار”، – دەلىنگەن پرەمەر-مينيستر بينيامين نەتانياحۋ كەڭسەسىنىڭ مالىمدەمەسىندە.
حاماس باقىلاۋىنداعى گازا ازاماتتىق قورعانىس اگەنتتىگىنىڭ حابارلاۋىنشا، ءيزرايلدىڭ اۋە شابۋىلى سالدارىنان كەمىندە 20 ادام، سونىڭ ىشىندە بەس بالا قازا تاپتى، ال ونداعان ادام جارالانعان. بۇعان دەيىن يزرايل گازا سەكتورىنا ەلەكتر ەنەرگياسىن بەرۋدى توقتاتقان بولاتىن.
