بۇگىن ۇلتتىق اكادەميالىق كىتاپحانانىڭ فاريزا وڭعارسىنوۆا زالىندا «ۇلتتىق سپورت تۇرلەرى مەن مادەنيەتى اكادەمياسى» قۇرىلعانى حابارلاندى. ونى «ناۋرىزىم – نۇرلى ىرىسىم» مەرەكەلىك ءىس-شاراسى اياسىندا وتكەن جيىندا بەلگىلى كۇش مادەنيەتىن زەرتتەۋشى، جوبا قۇرىلتايشىسى ابىلايحان قالنازاروۆ ءمالىم ەتتى.
«مەنىڭ «كۇش مادەنيەتى» ۇعىمىن اينالىمعا قوسىپ جاتقانىمدى بىلەسىزدەر. وسى باعىتتى ارنايى عىلىم رەتىندە دامىتۋعا كۇش سالىپ جاتىرمىن. ماسەلەن، قازىرگى تاڭدا كوكپارعا قاتىستى ءتورت تومدىق كىتاپتارىم ءازىر. ماسەلە، تەك شىعارۋ مەن قارجىعا كەلىپ تىرەلدى. ونىڭ ەرەكشەلىگى، ۇلتتىق سپورتتى، اتاپ ايتقاندا، كوكپاردى يدەولوگيالىق نەگىزدە كورسەتۋىندە. ول كىتاپتاردا ابىلايحان مەن قابانباي، بوگەنبايلاردىڭ كوكپار تارتىسقاندارى تۋرالى دەرەكتەر بار. تاريحتاعى كوكپارشى بولعان پالۋان-باتىر انالارىمىز دا قامتىلدى. سالاعا قاتىستى تىڭ دەرەكتەر مەن ينسايتتار وتە كوپ»، – دەدى ابىلايحان مامىرايحانۇلى.
سونداي-اق ول قازىردىڭ وزىندە ءوز اۆتورلىعىندا بۇعان دەيىن جارىق كورگەن «بالۋان تاس» قوستومدىعىنىڭ ءۇشىنشى تومى، وسى تومداردان وربىگەن «بالۋاندار الەمى» كىتابى، «قازاق كۇرەسىنىڭ» بالالارعا ارنالعان وقۋلىعى مەن پالۋاندىق پەن باتىرلىقتى ناسيحاتتايتىن وقۋشىلارعا ارنالعان 3 كىتاپشانىڭ ءازىر تۇرعانىن باياندادى.
ايتا كەتەيىك، ۇلتتىق سپورت تۇرلەرى مەن مادەنيەتى اكادەمياسى – قازاق حالقىنىڭ بارلىق ءداستۇرلى سپورتىن ساقتاۋ، دامىتۋ جانە حالىقارالىق دەڭگەيدە تانىمال ەتۋگە باعىتتالعان يننوۆاتسيالىق ورتالىق. بۇل اكادەميا ۇلتتىق سپورت تۇرلەرىنىڭ فيزيكالىق، رۋحاني-مادەني جانە زياتكەرلىك قۇندىلىقتارىن زەرتتەپ زەردەلەپ، بولاشاق ۇرپاققا جەتكىزۋدى جانە سپورت ارقىلى ەلدىك رۋحتى كۇشەيتۋدى كوزدەيدى.
اتالمىش ءىس-شاراعا بىرقاتار تانىمال تۇلعالار جانە مەكتەپ وقۋشىلارى مەن ستۋدەنتتەر قاتىستى. بۇل ۇلتتىق اكادەميالىق كىتاپحانانىڭ ناۋرىز مەرەكەسىنە وراي بەلگىلەنگەن «شاڭىراق» كۇنىنىڭ دە مەرەيىن اسىرۋعا باعىتتالعان وتىرىستاردىڭ ءبىرى بولاتىن.
جيىن سوڭىندا كەلۋشىلەرگە ناۋرىز كوجە بەرىلىپ، باۋىرساقتار تاراتىلدى جانە كوپشىلىك بولىپ ەستەلىككە فوتوعا ءتۇستى.
