15 ناۋرىز كۇنى رەسەيلىك اسكەري ۇشاقتار توبى جاپون تەڭىزى ايماعىندا وڭتۇستىك كورەيانىڭ اۋە قورعانىسى سايكەستەندىرۋ ايماعىنا (KADIZ) كىردى، دەپ حابارلايدى “ادىرنا” ۇلتتىق پورتالى Yonhap اگەنتتىگىنە سىلتەمە جاساپ.
وڭتۇستىك كورەيانىڭ قارۋلى كۇشتەرى ءباسپاسوز قىزمەتى حابارلاعانداي، ۇشاقتار جەرگىلىكتى ۋاقىتپەن 09:20-دا (استانا ۋاقىتىمەن 06:20) ايماققا ەنىپ، ءبىراز ۋاقىتتان كەيىن شىققان.
وسىعان جاۋاپ رەتىندە وڭتۇستىك كورەيا ءوز جويعىش ۇشاقتارىن اۋەگە كوتەردى.
ماسكەۋ بىرنەشە رەت وڭتۇستىك كورەيانىڭ اۋە قورعانىسى سايكەستەندىرۋ ايماعىن بىرجاقتى بەلگىلەنگەن دەپ تانىماعانىن مالىمدەگەن. سوندىقتان بۇل ايماق باسقا ەلدەر ءۇشىن قۇقىقتىق مىندەتتەمەلەر تۋدىرمايدى.
دەگەنمەن، سەۋل بۇل ايماقتىڭ زاڭدىلىعىن تالاپ ەتىپ، وسى اۋماقتى كەسىپ ءوتۋ جوسپارلارى تۋرالى حابارلاۋدى سۇرايدى. وسى سەبەپتى، وڭتۇستىك كورەيا اۋە كەڭىستىگى بۇزىلماسا دا، ءوز جويعىش ۇشاقتارىن شىعارادى.
