پەتروپاۆلدا بىرنەشە كۇندىك ايازدان كەيىن كۇرت جىلىنۋ بولىپ، قاردىڭ ەرۋى سالدارىنان قالا كوشەلەرىن سۋ باستى، دەپ حابارلايدى “ادىرنا” ۇلتتىق پورتالى tengrinews.kz-كە سىلتەمە جاساپ.
قالا تۇرعىندارى جاياۋ جۇرگىنشى جولدارىنان ۇلكەن شالشىقتاردان ءوتۋ مۇمكىن ەمەس ەكەنىن ايتىپ شاعىمدانۋدا. سونىمەن قاتار، اۋلالارداعى بالشىق پەن بوساپ كەتكەن قار اۆتوكولىك قوزعالىسىنا كەدەرگى كەلتىرۋدە.
جۇمىسشى كەنتىنىڭ تۇرعىندارى الەۋمەتتىك جەلىلەردە كوشەلەردىڭ 90%-ى تىزەدەن كەلەتىن لايعا اينالعانىن مالىمدەدى. ولاردىڭ ايتۋىنشا، جولداردى قاردان تازارتۋ جۇمىستارى ۋاقىتىندا جۇرگىزىلمەگەن.
“كولىكپەن ۇيگە جەتۋ مۇمكىن ەمەس، ال اكىمدىك تاراپىنان ەشقانداي شارا قابىلدانباي جاتىر،” – دەپ جازدى تۇرعىنداردىڭ ءبىرى.
سونداي-اق، ۋنيۆەرسالنايا كوشەسىندەگى ۇيلەردىڭ تۇرعىندارى جاڭا تەمىرجول كوپىرىنىڭ قۇرىلىسى كەزىندە سۋ اعاتىن ارىقتاردىڭ بىتەلىپ قالعانىن ايتتى. سونىڭ سالدارىنان ەرىگەن قار سۋى ولاردىڭ ۇيلەرىنە كىرە باستاعان.
“قۇرىلىس باستالعانعا دەيىن مۇنداي ماسەلە بولعان جوق. قازىر سۋدىڭ اعاتىن جەرى جوق، سوندىقتان ۇيلەرىمىزگە قاراي جايىلىپ جاتىر،” – دەدى تۇرعىندار.
پەتروپاۆل قالالىق تۇرعىن ءۇي-كوممۋنالدىق شارۋاشىلىعى ءبولىمى ماسەلەنى شەشۋ ءۇشىن ارنايى تەحنيكانىڭ جىبەرىلگەنىن حابارلادى.
“قالا تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا سۋ سورعىش تەحنيكالار جۇمىس ىستەۋدە. سونىمەن قاتار، مەردىگەر ۇيىمدارعا سۋدىڭ ۇيلەرگە جاقىنداۋىنا جول بەرمەۋ ءۇشىن شارا قابىلداۋ تاپسىرىلدى،” – دەپ مالىمدەدى ۆەدومستۆو وكىلدەرى.
الايدا، بۇل جاۋاپ تۇرعىنداردى قاناعاتتاندىرمادى. ولار سۋ تاسقىنىنا كوپىر قۇرىلىسى سەبەپ بولعانىن جانە بۇل ماسەلەنى حالىقتىڭ ءوز موينىنا الۋىن ادىلەتسىزدىك دەپ سانايدى.
توتەنشە جاعدايلار دەپارتامەنتىنىڭ مالىمەتىنشە، وڭىردە الدىن الۋ شارالارى بەلسەندى جۇرگىزىلۋدە:
• 950 مىڭ تەكشە مەتر قار شىعارىلعان;
• 47 شاقىرىم قورعانىس بوگەتتەرى سالىندى، 41 شاقىرىمى نىعايتىلعان;
• 108 سۋ وتكىزۋ قۇبىرى ورناتىلعان;
• 214 شاقىرىم نوسەر كارىز جۇيەسى تازارتىلعان.
سۋ تاسقىنى كەزەڭىنە 1900-دەن استام قۇتقارۋشى، 1350-گە جۋىق ارنايى تەحنيكا، 462 موتوپومپا جانە 122 قايىق دايىندالعان.
قاۋىپتىڭ الدىن الۋ ءۇشىن تۇرعىندارعا مۇمكىندىگىنشە سۋ باسۋ قاۋپى بار اۋماقتاردان ۋاقىتشا كەتۋ ۇسىنىلادى.
