سەمەي قالاسىنداعى «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىندا بەلگىلى ابايتانۋشى، ۇستاز، مۋزەي ارداگەرى بەكەن يسابايۇلىنىڭ 95 جىلدىعىنا ارنالعان «ابايتانۋدىڭ ابىزى» اتتى ەسكە الۋ كەشى جانە كورمە اشىلدى، دەپ حابارلايدى "ادىرنا" ۇلتتىق پورتالى اباي مۋزەيىنىڭ ءباسپاسوز قىزمەتىنە سىلتەپ.
ءىس-شارانى اباي مۋزەي-قورىعىنىڭ ديرەكتورى ۇ.ساعاديەۆ اشىپ، ابايتانۋشىنىڭ ەڭبەگىنە توقتالدى. سونىمەن قاتار، «الاش ارىستارى – م.اۋەزوۆ» مۋزەيىنىڭ ءبولىم مەڭگەرۋشىسى ق.قيىقباي عالىمنىڭ ءومىرى مەن شىعارماشىلىعى تۋرالى بايانداما جاسادى.
كەش بارىسىندا اباي اۋدانىنىڭ قوعامدىق كەڭەس توراعاسى ت.امانعازين، تاريح عىلىمدارىنىڭ كانديداتى، پروفەسسور م.كارىموۆ، «ءان اتا» قوعامدىق قورىنىڭ ديرەكتورى، سۋرەتشى ق.يبراەۆ، بەلگىلى جۋرناليست، «انىق اباي» ءفيلمىنىڭ اۆتورى ق.امانجول، سونداي-اق ادەبيەت سىنشىسى ب.تۇرسىنبايۇلى، بورىلىدەگى م.اۋەزوۆ مۋزەي-ءۇيىنىڭ مەڭگەرۋشىسى، عالىمنىڭ ۇرپاعى ش.يساباەۆ ەستەلىكتەرىمەن ءبولىستى.
كەش بارىسىندا م.تولەباەۆ اتىنداعى مۋزىكالىق ۋچيليششە ستۋدەنتتەرى بەكەن يسابايۇلىنىڭ شىعارمالارىنان ادەبي كومپوزيتسيا ۇسىندى. سونىمەن قاتار، ونەرپازدار ابايدىڭ «كوك تۇمان – الدىڭداعى كەلەر زامان»، «سەگىز اياق»، «اقىلبايدىڭ ءانى»، سونداي-اق ب.يسابايۇلىنىڭ سوزىنە جازىلعان «شىڭعىستاۋعا ناز» اندەرىن ورىنداپ، كورەرمەندەرگە ەرەكشە اسەر سىيلادى.
ەسكە الۋ كەشىنىڭ سوڭىندا مۋزەي ارداگەرىنە ارنالعان كورمەنىڭ ەكسپوزيتسياسى تانىستىرىلدى. كورمەدە عالىمنىڭ تۇپنۇسقا قولجازبالارى، ەستەلىكتەرى، جەكە زاتتارى، دومبىراسى، شاپانى، تاقياسى، سونداي-اق ءار جىلدارى جارىق كورگەن ەڭبەكتەرى مەن فوتوسۋرەتتەرى قويىلدى.
كەش سوڭىندا بەكەن يسابايۇلىنىڭ وتباسى جۋرناليست ق.امانجولعا دومبىرا سىيعا تارتتى.
كورمەنى سەمەيلىكتەر مەن قالا قوناقتارى ءبىر اي بويى تاماشالاي الادى.
