قازاقستاننىڭ ەنەرگەتيكا ۆيتسە-ءمينيسترى سۇڭعات ەسىمحانوۆ سەمەي مەن وسكەمەن قالالارىندا جىلۋ ەلەكتر ورتالىقتارىن (جەو) سالۋ 2029 جىلدىڭ سوڭىنا دەيىن اياقتالاتىنىن مالىمدەدى، دەپ حابارلايدى "ادىرنا" ۇلتتىق پورتالى.
ال كوكشەتاۋ قالاسىنداعى جەو قۇرىلىسى 2029 جىلدىڭ ورتاسىندا اياقتالادى دەپ جوسپارلانىپ وتىر. بۇعان دەيىن بۇل نىسانداردى 2027 جىلى ىسكە قوسۋ جوسپارلانعان ەدى.
جوبانىڭ تاپسىرىس بەرۋشىسى رەتىندە سامۇرىق-ەنەرگو انىقتالعان. ۆيتسە-ءمينيستردىڭ ايتۋىنشا، 2026 جىلدىڭ ءساۋىر ايىندا ءۇش الاڭدا دا گەودەزيالىق جانە باسقا دا دايىندىق جۇمىستارى باستالۋى ءتيىس. كوكشەتاۋدا مۇنداي جۇمىستار وتكەن جىلى باستالعان.
2025 جىلعى 15 شىلدەدە «كوكشەتاۋ جەو» كومپانياسى قىتايلىق كومپانيالارمەن جوبالاۋ-سمەتالىق قۇجاتتاما ازىرلەۋ، جابدىقتار مەن ماتەريالدار جەتكىزۋ بويىنشا جالپى سوماسى 356,3 ملرد تەڭگەگە كەلىسىمشارتتار جاساعان. بۇعان دەيىن كومپانيا رەسەيلىك ينتەر راو ەكسپورت ۇيىمىمەن جۇمىس ىستەگەن، الايدا 2025 جىلعى ماۋسىمدا بۇل كەلىسىم توقتاتىلعان.
جوبانى قارجىلاندىرۋ سامۇرىق-قازىنا قورى ارقىلى جىلدىق 16,5% مولشەرلەمەمەن 10 جىلعا تارتىلادى. كومپانيا بۇل ينۆەستيتسيانى ەلەكتر ەنەرگياسىن ساتۋ جانە قۋات تاريفتەرى ارقىلى وتەۋدى جوسپارلاپ وتىر.
جاڭا ستانتسيالاردا وندىرىلەتىن جىلۋ ەنەرگياسىنىڭ وزىندىك قۇنى شامامەن 5 مىڭ تەڭگەگە دەيىن، ال ەلەكتر ەنەرگياسى 1 كۆت/ساع ءۇشىن 15–16 تەڭگە بولادى دەپ بولجانۋدا.
سەمەي جەو-سىنىڭ الدىن الا قۇنى 420 ملرد تەڭگە، ال وسكەمەندەگى جەو-2 جوباسىنىڭ قۇنى شامامەن 490 ملرد تەڭگە دەپ باعالانعان.
